سەرنووچە:

ئەمریکا هەلویستێ خۆ لسەر ئەرکدارکرنا مستەفا کازمی نیشاندا

فۆتۆ: 
2020-04-10

545 جار خوێندراوەتەوە

یاریدەدەرێ وەزیرێ دەرڤەیێ ئەمریکا بۆ کاروبارێن ڕۆژهەلاتا نێزیک ڕاگەهاند، ئەگەر مستەفا کازمی سەروەریا ولاتی بپارێزیت دێ مفای ب پەیوەندیێن ناڤبەرا عێراق و ئەمریکا گەهینیت.

دەیڤد شێنکەر ب ڕێیا تێلیکۆنفرانسێ بۆ میدیایان ڕاگەهاند، "ئەمریکا حکومەتەکا عێراقێ دخوازیت کو بکاربیت کار دگەل دا بکەت، د هەمان دەم دا ژی داخوازێن گەلێ عێراقێ جێبجیبکەت، حکومەتەک بیت کو پێگیری چاکسازیان بیت و دژی گەندەلیێ ڕاوەستیت".

ڕاگەهاند ژی، "ئەگەر کازمی یێ نیشتیمانپەروەر بیت و سەروەریا ولاتی بپارێزیت، ئەڤە بۆ عێراقیان و پەیوەندیا ناڤبەرا عێراق و ئەمریکا ژی دێ گەلەکا باش بیت".

بەحسا وێ یەکێ ژی کریە، مستەفا کازمی وەک سەرۆکێ دەزگەهێ ئیستیخباراتیا عێراقێ کارێن باش کرینە.

ئەڤە ژی دەمەکێ دایە، دوهی سەرۆکاتیا کۆمارا عێراقێ مستەفا کازمی بۆ پێکئینانا کابینەیا نوو ئەرکدارکر، ئەڤە ژی پشتی وێ یەکێ هات کو عەدنان زورفی ژ ئەرکداریا وی پۆستی ڤەکشیا.

هەر دوهی ژی، ئیرانێ پێشوازی ژ ئەرکدارکرنا مستەفا کازمی کر و ئەو یەک ب کارەکێ ڕاست بناڤکر و دازانین، تەهران یا بەرهەڤە بۆ هەڤبەندیێ دگەل حکومەتا داهاتییا عێراقێ.

س.م