سەرنووچە:

ڤیدیۆ.. پۆلیسێن دهۆکێ نووترین زانیاری لسەر وێ باندا کو محاویلەیێن کارەبێ ددزین بەلاڤکرن

ئەو باندە ژ سێ کەسان پێکدهات و خەلکێ ئاکرێ نە
فۆتۆ: 
2020-02-24

480 جار خوێندراوەتەوە

پشتی دەستەسەرکرنا باندەکا دزینا محاویلەیێن کارەبێ د چەند ڕۆژێن دەربازبوویی دا، ئەڤرۆ پۆلیسێن دهۆکێ ڕاگەهاند، ئەو باندە ل ناحیەیا قەسرۆک هاتیە دەستەسەرکرن و دان ب تاوانا خۆ دانانە.

د گرتەیەکا ڤیدیۆیی دا هێمن سلێمان پەیڤدارێ پۆلیسێن دهۆکێ ڕاگەهاند، ئەو باندە ژ سێ کەسان پێکدهات، ل ڕۆژا ١٦ێ ڤێ مەهێ دگەل تڕۆمبێلەکا پیکاب نیسان، ژ ئالیێ پۆلیسێن ناحیەیا قەسرۆک ب هەڤبەندی دگەل پۆلیسێن ئاکرێ هاتنە دەستەسەرکرن.

بەحسا وێ یەکێ ژی کر، تۆهمەتاباران دانپێدان ب تاوانا خۆ کرینە و پەڕەیێن ڤەکۆلینێ ژی بۆ وان ل بنگەهێ پۆلیسێن قەسرۆک هاتیە ڤەکرن و ل دیف بەندێ ٤٤٣ ژ یاسایا سزادانێ هاتنە بەندکرن.

گوت ژی، ئەو سێ تۆهمەتبارە خەلکێ گوندێ کەلاتن یا سەر ب ناحیەیا بجیلێ ل سنورێ قەزا ئاکرێ.

ئەڤە ژی دەمەکێ دایە، ل دۆماهیکا سالا ٢٠١٩ێ دیاردەیا دزینا محاویلەیێن کارەبێ و بیرێن ئاڤێ ل سنورێن هەرسێ قەزایێن ئاکرێ، بەردەڕەش و شێخان سەرهەلدا و چەندین محاویلە ژی هاتن دزین، دگەل ڤێ یەکێ ژی پۆلیسێن وان قەزایان هاتبوون ئەرکدارکرن کو وان کەسێن بڤی کاری ڕادبن دەستەسەر بکەن.

س.م