سەرنووچە:

رێڤه‌به‌ریا گشتیا باژێرڤانیان ل دهۆكێ‌ هوشداریێ‌ ب وەلاتیان دده‌ت

فۆتۆ: 
2020-01-24

837 جار خوێندراوەتەوە

رێڤه‌به‌ریا گشتیا باژێرڤانیان ل دهۆكێ‌ هوشداریێ‌ ب وەلاتیان دده‌ت کو قه‌ستا رێیێن ده‌رڤه‌ی باژاران نه‌كه‌ن ژبەر کو كه‌شوهه‌وا زێدە تێكچوویه‌ و مه‌ترسی‌ لسه‌ر رێیا درستبوویە.

رێڤه‌به‌ریا گشتیا باژێرڤانیان ل پارێزگه‌ها دهۆكێ هۆشداری ب وەلاتیان دا و راگەهاند، بۆ رێیێن ده‌رڤه‌ی باژاران نەچن ژبەر کو كه‌شوهه‌وا زێدە تێكچوویه‌، نها وان ب رێیا باژێرڤانیێن خۆ یێن قه‌زا و ناحیان، پتر ژ ٢٠ تیم بۆ ڤه‌كرنا رێیێن سه‌ره‌كی و ناڤ باژاران پێكئیناینه‌ و نها د ناڤ جهێن به‌فر دباریت دا كار دكه‌ن و به‌رده‌وام د هەوارا وان وەلاتیان دا دچن ئه‌وێن د ناڤ به‌فرێ‌ دا ئاسێ‌ بووین و هاریكاریا وان بۆ رزگارکرنێ دكه‌ن.

هەروەسا د هۆشداریێ دا هاتیە، ئاگه‌هداریا هه‌موو شۆفێر و وەلاتیان دكه‌ت ب چ ئاوایەکێ نه‌چنه‌ رێیێن ده‌رڤه‌ی باژاران، ژبەر کو به‌فر ژ شه‌ڤا دەربازبوویی وه‌ره‌ به‌رده‌وام دباریت و پتریا رێكان هاتینه‌ داخستن.

ئاماژە کریە ژی ، ل ده‌ڤه‌را ئامێدیێ و بەشەکا ده‌ڤه‌را ئاكرێ به‌فر باریه‌ و ئاریشە بۆ هاتن و چوونا شوفێر و وه‌لاتیان دروستكریه‌ و بوویه‌ سەدەما ژكاركه‌فتن و گرتنا هنده‌ك ژ رێیێن سه‌ره‌كی و لاوه‌كی و تیمێن رامالینا به‌فرێ ژ ئالیێ هه‌موو وان باژێرڤانیێن كو به‌فر ل ده‌ڤه‌رێن وان باریە، ل سه‌ر ڤه‌كرنا رێیا ژ به‌فرێ به‌رده‌وامن ب تایبه‌تی ل چیایێ پیرس و كانی ماسێ و چه‌مانكێ و سه‌رسنكێ و دێره‌لوكێ و قه‌دشێ‌ و زاویته‌ و باگێرا و مانگێش و ئه‌ترووش.

دایە زانین ژی، شه‌ڤا دەربازبوویی و ئه‌ڤرۆ ژی، پێله‌كا به‌فرێ چیایێ پیرس یا سه‌ر ب ناحیا دینارته‌ ڤە ڤه‌گرتیه‌ و بوویه‌ سەدەم كو رێیا د ناڤبه‌را ده‌ڤه‌را بارزان و دینارته‌ بهێته‌ گرتن، ژبه‌كو به‌فر یا به‌رده‌وامه‌، باژێرڤانیا دینارته‌ ژی ب ئاوایەکێ ده‌مكی رێیا چیایێ پیرس گرت داكو سه‌ر و مالێ وه‌لاتیا و شوفێران یا پاراستی بیت.