سەرنووچە:

هاتن و چوونا دهۆکێ هۆشداریێ ب شۆفێران ددەت

ژبەر بارینا بەفرێ
فۆتۆ: 
2020-01-24

797 جار خوێندراوەتەوە

دیجیتال میدیایا ئێن ئاڕ تی، دهۆک، بێوار حیلمی

پێلەکا بەفربارینێ سنورێ هەردوو قەزایێن ئاکرێ و ئامێدیێ ڤەگرتیە و ژبەر بارینا ڕێژەیەکا زۆر ئاستەنگا هاتن و چوونێ بۆ چەندین ڕێیان دروست بوویە، هاتن و چوونا دهۆکێ ژی شۆفێران ئاگەهدار دکەت وان ڕێیان بکار نەئینن.

ئازاد تاها پەیڤدارێ هاتن و چوونا دهۆکێ د داخویانیەکێ دا بۆ دیجیتال میدیایا ئێن ئاڕ تی ڕاگەهاند، ژبەر بارینا ڕێژەیەکا زۆر یا بەفرێ ل سنورێ قەزا ئامێدیێ، ئاستەنگی بۆ ڕێیێن د ناڤبەرا گوند و ناحەیێن وێ دا دروستبوویە، داخوازێ ژ شۆفێران دکەن خۆ ژ بکارئینانا وان ڕێیان ب پارێزن، یان ژی ب تڕۆمبێلێن دەبل ئەکسل هاتن و چوونێ بکەن، ژبەر کو ئەگەرا ئاسێبوونێ هەیە.

دەربارەی ڤێ یەکێ ژی دێوالی حەمە بریندار ڕێڤەبەرێ سەخبێری و پاراستنا رێک و پران ل دهۆکێ بۆ دیجیتال میدیایا ئێن ئاڕ تی دازانین، ئەڤرۆ دانێ سپیدێ پڕانیا ڕێکێن سنورێ قەزا ئامێدیێ ژبەر بەفرێ هاتبوون داخستن، زێدەباری کارکرنا بەردەواما تیمێن ڕامالینا بەفرێ، لێ هەموو ڕێ نەهاتینە پاقژکرن.

هەڤدەم ل هند دەڤەرێن سنورێ قەزا ئاکرێ ژی ژ شەڤێدی ڤە بەفر بارینێ دەستپێکریە و ب وێ سەدەمێ ژی ڕێیا چیایێ پیرس کو قەزا ئاکرێ ب قەزا مێرگەسۆر ڤە گرێددەت هاتیە داخستن، ڕێڤەبەریا سەخبێریا ڕێ و پران یا ئاکرێ ژی د زەلالکرنەکێ دا ڕاگەهاند، هەیا نها زێدەتری ٣٠ سانتیمێن بەفرێ ل چیایێ پیرس بارینە و داخوازێ ژ وەلاتیان دکەن هاتن و چوونێ تێدا نەکەن، هەیا کو ب تەمامی دهێتە پاقژکرن.

ئەڤە ژی دەمەکێ دایە، کو د چەند ڕۆژێن دەربازبوویی دا سەقاناسیا هەرێمێ بەلاڤکر، کو دێ پێلەکا بەفر و بارانێ سنورێن پارێزگەهێن هەولێر، سلێمانی و دهۆکێ ڤەگریت و باندۆریا وێ پێلێ ژی دێ هەیا ڕۆژا شەمبیێ بەردەوام بیت.

س.م