سەرنووچە:

مەزلوم کۆبانێ بەرسڤا ڕووسیا دا

فۆتۆ: 
2020-01-17

430 جار خوێندراوەتەوە

مەزلوم کۆبانێ د تویتەکێ دا بەرسڤا داخویانیەکا وەزیرێ دەرڤەیێ ڕووسیا دا و ڕاگەهاند، ئەوا لاڤرۆڤ بەحس دکەت گەلەک هوور نینە.

پشتی کو سێرگی لاڤرۆڤ وەزیرێ دەرڤەیێ ڕووسیا ڕاگەهاندی، "نێزیکی ١٠ هزار تیرۆرست ل ڕۆژهەلاتا فورات ل سوریا هەنە"، مەزلوم عەبدی بەرنیاس ب مەزلوم کۆبانێ فەرماندارێ گشتیێ هێزێن سوریایا دیموکرات، د تویتەکێ دا بەرسڤا ناڤبری دا و گوت، "ئەو ڕاپۆرتێن لاڤرۆڤ بەحس دکەت گەلەک هوور نینە، هەڤکاریا ڕۆژانەیا هێزێن مە دگەل هێزێن ناڤدەولەتی د ناڤا وان دا ژی ئەمریکا و ڕووسیا دەربارەی چارەنڤیسێ دەستەسەرکریێن داعشێ هەیە".

بەحسا وێ یەکێ ژی کر، "زێدەباری شیانێن مە یێن سنوردارکری و ئەو گەفا تورکیا بۆ سەر ئاشتی و ئارامیا دەڤەرێن دەستەسەرکریان دروستکری، ئەم سەرکەفتی بووین لسەر بڕێڤەبرنا ڤێ کەیسێ کو پارێزگاریێ ژ ئەولەهی و ئاشتیا جیهانی دکەت".

ئەڤە ژی دەمەکێ دایە، ئەڤرۆ وەزیرێ دەرڤەیێ ڕووسیا ڕاگەهاند، "دگەل وێ یەکێ کو کریزا سوریا پێشکەفتن بخۆڤە دیتیە و بەرەڤ چارەسەریێ دچیت، لێ نێزیکی ١٠ هزار تیرۆرست ل ڕۆژهەلاتا ڕووبارێ فوراتێ هەنە، ئەرکێ سەرەکیێ ڕووسیا ژی ڕووبڕووبوونا وانایە".

س.م