سەرنووچە:

رێکخراوەک: پەڕلەمانێ کوردستانێ د دەمێ زێدەتری سالەکێ دا تنێ دوو یاسا دەرکرنە

 ١٧ ڕوونشتن ژی لدارخستنە
فۆتۆ: 
2019-11-20

200 جار خوێندراوەتەوە

ڕێکخراوا ڤەکۆلین و گەشەپێدانێ ڕاگەهاند، پەڕلەمانێ کوردستانێ د دەمێ زێدەتری سالەکێ دا تنێ دوو یاسا و ١١ بڕیار دەرکرنە، ١٧ ڕوونشتن ژی لدارخستنە.

ئەڤرۆ چارشەمبێ (٢٠ مژدرا ٢٠١٩ێ ) ڕێکخراوا ڤەکۆلین و گەشەپێدانێ د چارچۆڤەیێ ڕاپۆرتەکا پێنج خالی دا، لبن ناڤ و نیشانێ پرۆژەیێ چاڤدێریکرنا سۆزێن هەلبژارتنێن پەڕلەمانێ کوردستانێ د سالا ٢٠١٨ێ دا، ئامارەک لسەر کارێن پەڕلەمانێ کوردستانێ د دەمێ زێدەتری سالەکێ دا بەلاڤکر.

 د ڕاپۆرتێ دا بەحسا چەندین خالان هاتیە کرن:

یەکەم- پەڕلەمانێ کوردستانێ د دەمێ زێدەتر ژ سالەکێ دا، تنێ دوو یاسا دەرکرنە، ئەو ژی وەک کاراکرنا سەرۆکایەتیا هەرێمێ و یاسایا تایبەت ب سەراستکرنا یاسایا جڤاتا پارێزگەهێن هەرێمێ، یاسایا یەکێ ژی ژ ئالیێ دەستەیا سەرۆکایەتیا پەڕلەمانی هاتیە ئیمزاکرن و بڕیارا هەژمارە پێنج بۆ دەرچوویە، ژبەر کو وی دەمی سەرۆکایەتیا هەرێمێ هاتبوو هەلاویستن، سەرۆکێ نوو نەهاتبوو دیارکرن.

دووەم- پەڕلەمانێ کوردستانێ د دەمێ زێدەتر ژ سالەکێ دا، تنێ ١١ بڕیار دەرکرنە، ژ وان ژی ٦ بڕیارێن تایبەت بڕێکخستن و کارێن نافخۆیێن پەڕلەمانی و دیارکرنا لیژنەیان و باوەری دان ب پەڕلەمانتارێن تازە یێن پەڕلەمانی ل جهێ سەرۆکێ بەرێ، یەک بڕیارا تایبەت ب درێژکرنا گەڕا بهارا خۆ بۆ دەمێ دوو حەفتیان، یەک بڕیارا تایبەت ب هەلبژارتنا سەرۆکێ نوویێ هەرێمێ، دوو بڕیارێن تایبەت ب باوەری دان ب سەرۆکێ جڤاتێ و وەزیران و یەک بڕیار ژی تایبەت ب دەستنیشانکرنا ڕۆژەکێ وەک جینۆسایدا ئێزیدیان.

سێیەم- ژ کۆما وان ١١ بڕیاران ل سەردەمێ سەرۆکایەتیا ڤالا فەرید ٧ بڕیار هاتنە دان و ل سەردەمێ ڕێواس فایەق ژی یەک بڕیار هاتیە دەرکرن و دووبڕیار ژی ب ئیمزایا هێمن هەورامی دەرچوویە.

چارەم- د دەمێ یەک سالێ دا پەڕلەمانێ کوردستانێ تنێ ١٧ ڕوونشتن کرنە، ب ئاوایەکێ کو ١٤ ڕوونشتن ئاسایی و سێ ڕوونشتن ژی نائاسایی هاتنە کرن.

پێنجەم- د دەمێ یەک سالێ دا پەڕلەمانێ کوردستانێ تنێ خاندن بۆ ١٠ پێشنیازێن یاسایی کریە، دوو ژ وان پێشنیازان ژی بووینە یاسا، لێ ٨ پێشنیازێن دی نەچووینە قۆناغا دەرچوونێ وەک یاسایێ، لێ پێشنیازێن وەک سەڕاستکرنا مرۆڤسازیێ  ل هەرێمێ، تابۆکرنا خانیێن کو ب زێدەگاڤی هاتنە دورستکرن، سەڕاستکرنا ڕووبڕووبوونا ب قارچاغبرنا نەفتێ و بەرهەمێن وێ، یاسایا فیدڕالی بۆ پاراستنا بەرهەمێن عێراقی، سەڕاستکرن و ڕێکخستنا عەلوان، یاسایا فرۆتنا بەرهەمێن نەفتێ نەگەهشتیە قۆناغا داویێ هەیا کو ببنە یاسا و مەڕسوم بۆ دهێتە دەرکرن.

س.ع