سەرنووچە:

سلێمانی.. تەقە ل بارەگەهێ لقا چار یێ پارتی هاتە کرن

بەریا دەمەکێ کێم
فۆتۆ: 
2019-09-20

461 جار خوێندراوەتەوە

بەریا دەمەکێ کێم ژ ئالیێ چەند کەسێن نەنیاس ڤە تەقە ل بارەگەهێ لقا چار یێ پارتیا دیموکراتا کوردستانێ ل جادەیا سالم یا سلێمانیێ هاتەکرن.

نووچەگەهانا ئێن ئاڕ تی ڕاگەهاند، بەریا دەمەکێ کێم ژ ئالیێ چەند کەسان ڤە تەقە ل بارەگەهێ لقا چار یێ پارتی ل جادەیا سالم یا سلێمانیێ هاتە کرن، هەیا نها ناهێت زانین سەدەما تەقەکرنێ چ بوویە و تەقە ژ ئالیێ کێ ڤە هاتیە کرن.

دازانین ژی، هەر پشتی بوویەرێ دەملدەست هێزێن ئەولەهیێ یێن سلێمانیێ گەهشتنە جهێ بوویەرێ و ڕێیا سەرەکی یا جادەیا سالم ل هەمبەر هاتنوچوونا وەلاتیان داخستیە و دەست ب ڤەکۆلینێ کرنە.

هەڤدەم عەتا شێخ حەسەن پەیڤدارێ جڤاتا سەرکرداتیا سلێمانی هەلەبجە یێ پارتی بۆ ئێن ئاڕ تی ڕاگەهاند، ئەو تەقەکرن ژ ئالیێ چەند کەسێن نەنیاس ڤە هاتیە کرن و د وێ بوویەرێ دا چ کەس بریندار نەبوونە.

بەحسا وێ یەکێ ژی کر، د وێ تەقەکرنێ دا چەند گولە بەر ب ئاڤاهیێ لقا چار یا پارتی کەفتنە، بەرپرسیارەتیا پاراستنا بارەگەهـ و کادرێن پارتی د ستۆیێ هێزێن ئەولەهیێ یێن سلێمانیێ دایە".

ئەڤە ژی پشتی وێ یەکێ هات کو ئەڤرۆ مەحمود سەنگاوی ئەندامێ سەرکرداتیا یەکێتیێ ب مەرەما پشکداریکرن د جڤینا مەکتەبا سیاسیا حزبا خۆ دا سەرەدانا هەولێرێ کر، لێ ل نێزیک زالگەها دۆلا سماقولێ ڕێگری لێهاتە کرن و ڕێ پێنەهاتە دان بچیتە هەولێرێ، ڤێ یەکێ ژی کارڤەدانێن جودا ل دیف خۆ دا ئینان.

هەر پشتی وێ ژی بوویەرێ ب چەندەکێ لەتیف شێخ مستەفا پەیڤدارێ یەکێتی ڕاگەهاند، ئەو کار جهێ قەبولکرنێ نینە و ئەوا ل هەمبەری وان هاتیە کرن دژی هەموو پەیوەندیێن بهێزێن وانن کو د گەل پارتی دا هەنە.

س.م