|
|
|
بۆتاوتوێكردنی قەیرانی سوریا، ئەنان سەردانی تاران دەكات
|
ئەحمەد فەوزی وتەبێژی كۆفی ئەنان نوێنەری هاوبەشی نەتەوە یەكگرتووەكان و كۆمكاری عەرەبی بۆ سوریا رایگەیاند، بۆ گفتوگۆكردن لەسەر بارودۆخی سوریا لەگەڵ لێپرسراوە باڵاكانی ئێراندا، رۆژی 11ی ئەم مانگە ئەنان سەردانی تاران دەكات.
رۆژی 27ی شوباتی رابردوش ئەنان پێش چەند ڕۆژێك دەستنیشانكردنی وەك نوێنەری نەتەوە یەكگرتوەەكان و كۆمكاری عەرەبی لە سوریا، لەگەڵ عەلی ئەكبەر ساڵحی وەزیری دەرەوەی ئێران كۆبووەوە.
بەوپێیەی ئێران یەكێكە لە هاوپەیمانە سەرەكییەكانی سوریا لەناوچەكە، پێدەچێت ئەنان بیەوێت لە رێگەی تارانەوە فشار لەسەر بەشار ئەسەد دروستبكات بۆ راگرتنی توندوتیژییەكان لەدژی خۆپیشاندەرانو كشانەوەی هێزەكانی لەنێو شارەكاندا.
هاوكات وتەبێژی كۆفی ئەنان رایگەیاند، دەسەڵاتدارانی سوریا ئەنانیان ئاگادار كردۆتەوە لە كشانەوەی هێزەكانیان لە 3 شاری سەرەكی سوریا، كە بریتین لە شارەكانی درعا و ئیدلب و زەبەدانی.
ئەمڕۆ بەر لە گەیشتی فەرماندەیەكی سەربازی سەر بە هێزە ئاشتیپارێزی نەتەوە یەكگرتووەكان بۆ سوریا، بەمەبەستی وەرگرتنی رەزامەندی بەشار ئەسەد لەسەر بڵاوكردنەوەی 250 چاودێری بێ چەك لەناوخۆی ئەو وڵاتەدا ، دووبارە پێكادانەكانی نێوان هێزەكانی سوپای سوریا و ئۆپۆزسیۆن لە شارۆچكەیەكی نزیك دیمەشقی پایتەخت بەسەختی دەستپێكردەوە.
|
|