سەردێڕ:

ھاوپەیمانی لەپێناو خەڵک ١٧ خاڵ پێشکەش بە فراکسیۆنی سەدری دەکات بۆ دانیشتنی سبەینێی پەرلەمان

PM:11:49:25/03/2022

37960 جار خوێندراوەتەوە

هاوپەیمانی لە پێناو خەڵک پەیامێکی ١٧ خاڵی لەبارەی ئامادەبوون لە دانیشتنی سبەینێی پەرلەمانی عێراقەوە بڵاوکردەوە و تیایدا هاتووە، "ئێمە لە نەوەی نوێ و ئیمتیداد بەشێک لە پەرلەمانتارە سەربەخۆکان لە پێناو هاوڵاتییانی عێراقی سبەینێ بەشداری دانیشتنی پەرلەمان دەکەین لەبەرامبەر ئەو ١٧ مەرجەی دەیخەینە بەردەم هاوپەیمانی سێ قۆڵی.


ئەمڕۆ هەینی، هاوپەیمانی لە پێناو خەڵک و ژمارەیەک لە پەرلەمانتاری سەربەخۆ لە راگەیەنراوێکیاندا، ١٧ مەرج و داخوازییان بڵاوکردەوە کە تیایدا داوای ژمارەیەک چاکسازی خێرا و بنەڕەتی دەکەن بە ئامانجی باشتر خزمەت کردنی هاوڵاتییان.

لە راگەیەنراوەکەدا هاتووە، "ئەگەر هاوپەیمانی سێ قۆڵی مەرجەکانیان قەبوڵنەکرد و واژۆیان نەکرد و گەرەنتی جێبەجیکردنیان لە حکومەتی داهاتوودا نەدوا ئەوا بەشداری ناکەین".

ئاماژەی بەوشداوە، پێویستە هەموو لایەک بزانن ناکرێت پەرلەمانتارێک بەهۆکاری داخوازی کەسی و بەرژەوەندی خۆی و دەستخستنی پۆست و وەزارەت بایکۆتی دانیشتنی پەرلەمان بکات.

دەشڵێن، "هیچ هێزێکی ئۆپۆزسیۆن کە جگە لەپەرلەمان هیچ شوێنێکی نییە دەنگی خەڵکی تێدا بەرزنەکرێتەوە و بە بایکۆت کردن کارەکانی پەرلەمان پەکبخات. ئامادەبوونیشمان گەڕانەوەی رێزە بۆ ئەو دامەزراوەیە".

ئاماژەی بەوەشداوە، بەشداربوون و ئامادەبوون لە دانیشتنی پەرلەمان بەواتای لایەنگیری بۆ هیچ لایەنێک و بەشداریکردنی حکومەتی داهاتوو نییە، بەڵکو رۆڵی ئۆپۆزسیۆن ئەوەیە لەم خولەدا بە بەهێزییەوە چاودێری کارەکان حکومەت بکات و لێپرسینەوە لە حکومەتی داهاتوو بکات.

لە راگەیەنراوەکەدا باس لەوەشکراوە، ئامادەبوون لە دانیشتنەکانی پەرلەمان لە پێناو بەدەستهێنانی بەرژەوەندییەکانی خەڵک و دەنگنەدانە بە هیچکام لە کاندیدە سەرەکییەکان بۆ پۆستی سەرۆک کۆمار، ئەمەس سەربەخۆیی پەرلەمانتارولایەنە سەربەخۆکانە، بەڵام ئامادەنەبوون لە دانیشتنی پەرلەمان واتە لایەنگری لایەنێکی دیاری کراو.

ئەو ١٧ خاڵەی هاوپەیمانی لەپێناوخەڵک پێشکەشی هاوپەیمانی سێ قۆڵی کردووە بۆ بەشداری لە کۆبونەوەی سبەینێ:

١- حکومەت نرخی نەوت و بەنزین و بەرهەمە نەوتییەکان دابەزێنێت لە پێناو هاوڵاتییاندا لەسەرتاسەری وڵاتدا و لە هەرێمی کوردستانیش بەتایبەتی، بەهۆکاری ئەو دۆخە سەختەی هاوڵاتییانی هەرێم پێیدا تێپەردەبن.

٢- بڕی سوتەمەنی بڕیاردراو "نەوت و بەنزین" رەوانەی هەرێم بکرێت لەگەڵ زیادکردنی پشکی هەرێم تیایدا.

٣- ئاوەدان کردنەوەی ئەو ناوچانەوەی لەلایەن دەسەڵاتی رژێمی پێشووەوە زیانیان بەرکەوتووە، وەک هەڵەبجە و ئیدارەی گەرمیان (کەلار وکفری).

٤- کردنەوەی لقی بانکەکانی حکومەتی فیدڕاڵی لە هەرێم و پێدانی قەرز و پێشینەکان هاوڵاتییانی هەرێمیش بگرێتەوە.

٥- هاوتاکردنی موچەی پێشمەرگە لەگەڵ موچەی هێزەکانی عێراق و بەشێوەی راستەوخۆ لە بەغداوە مووچە بدرێت بەهێزەکانی پێشمەرگە.

٦- هەوڵبدرێت بۆ دابەزاندنی نرخی دۆلار بەرامبەر دینار بەگوێرەی میکانیزمێکی ئابوری کار لەسەر کراو و پشتیوانی بەرهەمی ناوخۆیی بکرێت بەرامبەر کاڵا و شمەکی هاوردەکراو.

٧-لێپرسینەوە لە ئەنجامدەرانی بکوژان و خوێنڕێژانی گەنجانی تشرین (رووداوەکانی سنک و گۆڕەپانی شۆرشی تشرین و گۆڕەپانی سەدر و گۆڕەپانی فڕۆکەخانە و سەرجەم گۆڕەپانەکانی دیکە) لەسەرو هەمووشیانەوە رووداوەکانی حزری زەیتون و ئەوانەی تۆمەتبارن بە ئەنجامدانی وەک "جەمیل شمری و حادل دەخیلی و عومەر نزار " و ئەوانی دیکەش.

٨- ئاشکرا کردنی سەرجەم ئەوکەسانەی رفێندراون و چارەنوسیان دیارنییە و بەدواداچوون بۆ ئەم دۆسییەیە بکرێت بەشێوەیەکی زۆر باش لەنێویشیاندا دۆسییەکانی "سەجاد عێراقی و فەرەح بەدری و واعی جبوری و عەلی جاسب و جەلال شەحمانی".

٩- لێبوردنی گشتی و تایبەت بۆ سەرجەم خۆپیشاندەران دەربکرێت و بە بێ تاوان بناسێنرێن.

١٠- چارەسەری راستەقینە و دروست بۆ دۆسیەی ئاوارەکان بدۆزرێتەوە و کۆتایی بە ئازارەکانیان بهێنرێت و هەلی کاری گونجاویان بۆ بڕەخسێنرێت.

١١- کار لەسەر پرۆژەی فاو بکرێت و کەمترین ماوەش بۆی دوو ساڵ بێت و بە جدی کاری لەسەر بکرێت و پێداچوونەوە بە قۆناغەکانی کارکردن تیایدا بکرێت.

١٢- یاسای داواکاری گشتی چالاک بکرێت.

١٣- جێبەجێکردنی یاسای پارت و حیزبەکان و رێگەنەدان بە هیچ پارتێک هێزی چەکداری هەبێت و بەشداری هەڵبژاردنەکان بکات و مۆڵەتی کارکردنی سیاسی لێ بسەنرێتەوە.

١٤- یاسایەک دەربکرێت لەبارەی مافی بەدەستهێنانی زانیاری.

١٥- سەرجەم ئەو یاسایانە هەڵبوەشینرێنەوە کە ئازادی رادەربڕین و رەخنگرتن لە هێماکانی دەسەڵات و جگە لەوانیش سنوردار دەکات کە پەیوەستە بەو یاسایانەی لە ئەنجومەنی شۆڕشی هەڵوەشێنراوەوە سەرچاوەیان گرتووە و بگۆڕدرێن بە یاسایەک پشتیوانی لە ئازادی بکات.

١٦- بەرنامەیەکی روون دابنرێت و میکانیزمی سەرکەوتووی بۆ دانبرێت و بودجەیەکی بۆ تەرخان بکرێت بە ئامانجی رەخساندنی هەلی کار لە هەردوو کەرتی گشتی و تایبەت بۆ ئەو کەسانەی بێ کارن.

١٧- گەرەنتی کردنی دەستە سەربەخۆکان لە رێگەی دحزینەوە میکانیزمێکی نوێ بۆ هەڵبژاردنی کەسایەتییەکان و دورخستنەوەی هەر دەستوەردانێکی حزبی و پشکپشکێنە لە پێکهێنانیدا و دەسەڵاتە چاودێرییەکانی فراوانتر بکرێن وەک دەستەی دەستپاکی.













گەلەری