وتەبێژی فەرماندەیی ئۆپراسیۆنە هاوبەشەکانی عێراق رایگەیاند، پێکهێنانی دوو لیوا هاوبەشەکەی پێشمەرگە و سوپای عێراق لە قۆناغەکانی کۆتاییدایە.
تەحسین خەفاجی وتەبێژی فەرماندەیی ئۆپراسیۆنە هاوبەشەکانی عێراق لە لێدوانێکدا بۆ ئێن ئاڕ تی ئاماژەی بەوەشکردووە، ژمارەی هێزەکان بۆ لیواکان دیاریکراوە و راهێنانیان پێکراوە، دەشڵێت، بە زووترین کات جێگیر دەکرێن لەو ناوچانەی بۆشایی ئەمنی تێدایە.
بەگوێرەی رێککەوتنی نێوان هێزەکانی پێشمەرگە و سوپای عێراق،
دەبێت چەند بنکەیەکی هاوبەش و هەماهەنگی بکرێتەوە و ئەو ناوچانەی بۆشایی ئەمنییان
هەیە لە نێوان هەردوولا بە هێزە هاوبەشەکە پڕبکرێنەوە و خاڵی پشکنینی هاوبەش لە نێوانیاندا
دابمەزرێنن و لە میحوەرە جیاوازەکان چالاکییەکانیان فراوانتر بکەن.
ئەمەش لەکاتێکدایە، ئەو بۆشاییە ئەمنییەی لە نێوان پێشمەرگە
و سوپای عێراقیدا دروستبووە، بووەتە دیارترین ئاڵنگارییەکانی بەردەمیان و چەکدارانی
داعش سودێکی زۆریان لەو بۆشاییە ئەمنییە بینیوە بۆ ئەنجامدانی هێرشەکانیان بۆسەر هەردوولا
و فراوانتر کردنی روبەری چالاکییەکانیان.
لە ٤ی شوباتی ئەمساڵدا، عەبدولخالق تەڵعەت نوێنەری حکومەتی
هەرێم لە فەرماندەیی هێزە هاوبەشەکانی عێراق بە ئێن ئاڕ تی راگەیاند، "زۆرینەی
ئامادەکارییەکان و رێوشوینە پێویستەکانی تایبەت بە مەشقکردن و کاروبارە هونەرییەکان
و پڕچەککردنی دوو لیواکە تەواو بووە تەنیا ئەوە ماوە موچەکان لەسەر وەزارەتی بەرگری
عێراق جێگربکرێت."