سەردێڕ:

سەرۆکی ئەمریکا کوژرانی سەرکردەی داعشی راگەیاند

PM:04:15:03/02/2022

9964 جار خوێندراوەتەوە

جۆ بایدنی سەرۆکی ئەمریکا کوژرانی ئەبو ئیبراهیم قوڕەیشی سەرکردەی داعشی لە ئیدلیب و دەستگیرکردنی سەرکردەیەکی قاعیدەی راگەیاند و دەشڵێت، لە دوای کوژرانی ئەبوبەکر بەغدادی سەرکردەی پێشووی داعش؛ گەورەترین ئۆپەراسیۆنە.


لەدوای کوشتنی بەغدادییەوە ئەمریکا دووەم گەورەترین هێرشی کردە سەر چەکدارانی داعش و وەزارەتی بەرگری ئەمریکا رایگەیاند، هێزەکانیان ئۆپەڕاسیۆنێکی رووبەڕووبوونەوەی تیرۆریان بەسەرکەوتووییانە لە ناوچەکانی باکوری رۆژئاوای سوریا لە شەوی چوارشەممە و بەیانی پێنجشەممەدا جێبەجێکردووە.

لەو بارەیەوە جۆ بایدن لە تویتێکدا بڵاویکردووەتەوە، "شەوی ڕابردوو سوپای ئەمریکا ئۆپەراسیۆنێکی دژە تیرۆری لە شاری ئیدلبی سوریا بەسەرکەوتوویی ئەنجامدا و بە سوپاسەوە و بە ئازایەتی هێزە چەکدارەکانی ئێمە، ئەبو ئیبراهیم ئەلهاشمی ئەلقوڕەیشی سەرکردەی داعش کوژرا و لە مەیدانی شەڕ دوورخرایەوە."

جۆن کێربی وتەبێژی پنتاگۆنیش دووپاتیکردەوە، هیچ زیانێکی گیانی لە سەربازانی سوپای ئەمریکا تۆمار نەکراوە و لەداهاتوودا وردەکاریی زیاتر ئاشکرا دەکەن.

هەر ئەمڕۆش، ئاژانسی رۆیتەرز بڵاویکردەوە، دانیشتووان و چەند چاوگێک لەناو چەکدارانی ئۆپۆزسیۆنی سوریا باسیان لە هێرشی هاوپەیمانان بە سەرۆکایەتی ئەمەریکا کردووە لە شارۆچکەیەکی باکوری سوریا و چەند هەلیکۆپتەرێک لە ناوچەیەکی نزیک شارۆچکەی ئەتمەی سەر بە پارێزگای ئیدلب، کە دەکەوێتە ناوچەیەکی ژێر کۆنترۆڵی ئۆپۆزسیۆنی سورییەوە نیشتیووەتەوە و دەنگی چەندین تەقینەوە بیستراوە لە نیزک ماڵی یەکێک لە توندڕەوە بیانییەکان.

ئەوەش دوای ئەوەدێت، لە ساڵی ٢٠١٩شدا ئەبوبەکر بەغدادی سەرۆکی رێکخراوی دەوڵەتی ئیسلامی لە عێراق و شام (داعش) لە هێرشێکی هێزە تایبەتەکانی ئەمریکا بە هاوکاری هێزەکانی هەسەدە لە باکوری رۆژئاوای سوریا کوژرا.














گەلەری