بەڕێوەبەرایەتی گشتی کەشناسی و بومەلەرزەزانی هەرێم رایگەیاند، نزمترین پلەی گەرمی تۆمارکراو لە ناوچەی حاجی ئۆمەران بووە کە ٧ پلە ژێر سفر بووە.
ئەمڕۆ شەممە، بەڕێوەبەرایەتی گشتی کەشناسی و بومەلەرزەزانی هەرێم لە راگەیەندراوێکدا نزمترین پلەکانی گەرمای تۆمارکراوی ئەمڕۆی ناوچەکانی هەرێمی کوردستانی بڵاوکردەوە تیایدا هاتووە، نزمترین پلەی گەرمی تۆمارکراو لە ناوچەی حاجی ئۆمەران بووە کە ٧ پلە ژێر سفر بووە.
ئاماژە بەوەشکراوە، لەدوای حاجی ئۆمەرانەوە هەریەک لەناوچەکانی،
پێنجوێن بە ٥ پلە ژێر سفر و چۆمان بە چوار پلە ژێر سفر و سمێلان بە ٣ پلە ژێر سفر
و ماوەت بە ٢ پلە ژێر سفر دێن.
باسی لەوەشکردووە، لە شارەکانی هەرێم نزمترین پلەکانی گەرما
بەم جۆرە بوون، هەولێر ٣پلەی سیلیزی و سلێمانی یەک پلەی سیلیزی ژێر سفر و دهۆک ٤
پلە و هەڵەبجە سفر پلەی گەرمی و کەرکوک چوار پلە.
ئەمەش لە کاتێکدایە شەوی رابردوو، بەڕێوەبەرایەتی گشتی کەشناسی
و بومەلەرزەزانی هەرێم رایگەیاند، بەیانی ئەمڕۆ ئاسمانى هەرێم نیمچە هەور و هەورى
تەواو دەبێت و بەفربارین لە ناوچە شاخاویەکان بەردەوامی دەبێت و لە درەنگانی ئەمشەودا
کۆتایی دێت.