نوسینگەی پارێزگاری هەولێر رایگەیاند، سبەینێ لەسەرجەم زانکۆ و قوتابخانە حکومی و ناحکومییەکان دەوامی فەرمی رادەگیرێت. دەشڵێت، "بەهۆی دابەشکردنی موچەوە لەسەرجەم دامودەزگاکان داوام دەبێت".
ئەمڕۆ چوارشەممە، نوسینگەی پارێزگاری هەولێر راگەیەنراوێکی بڵاوکردەوە و تیایدا هاتووە، بەهۆى پێشبینیەکانى کەشناسى و گۆڕانى کەش و هەوا و دابەزینى پلەى گەرمى، دواى گفتوگۆ و ڕاگۆڕینەوەى پارێزگارى هەولێر لەگەڵ سەرۆکی دیوانی ئەنجومەنی وەزیران و وەزیرى خوێندنى باڵا و وەزیرى پەروردە گەیشتنە ئەم بڕیارانەى لاى خوارەوە:
یەکەم/ بەیانى رۆژى پێنجشەممە ٢٠ی ١ی ٢٠٢٢، لەسەرجەم ناوەندەکانى
خوێندن "زانکۆ، پەیمانگا، قوتابخانە حکومى و ئەهلیەکان" دەوامی فەرمى رادەگیرێت.
دووەم/ له‌به‌ر ئه‌وه‌ى وەزارەتى دارایی لە پڕۆسەى دابەشکردنى
مووچەدایە، لە سەرجەم فەرمانگە و دامەزراوە حکومیەکان پشوو نابێت و دەوامى فەرمییە.
سێیەم/ ئه‌م بڕیارانە سنوورى ئیدارەى سەربەخۆى سۆران
ناگرێتەوە.
هەروەها، ئەمڕۆ چوارشەممە، ئیدارەی راپەڕین راگەیەنراوێکی
بڵاوکردەوە و تیایدا هاتووە، لە سەرجەم دامودەزگا حکومەییەکانی سنورەکە دەوامی فەرمی
راگیراوە جگە لە تیمە خزمەتگوزارییەکان و تیمەکانی پاککردنەوە و هێزە ئەمنییەکان.
ئاماژەی بەوەشکردووە، بڕیارەکە لەدوای راوێژکردن بووە لەگەڵ
دەزگا کەشنیاسییەکان و بەمەبەستی سەلامەتی گیانی فەرمانبەران ئەو بڕیارەیانداوە.
هەر ئەمڕۆش، هەردوو ئیدارەی زاخۆ و سۆران و پارێزگای هەڵەبجە
راگرتنی دەوامیان لەسەرجەم دامودەزگاکانی حکومەت راگەیاند و پارێزگاری سلێمانیش رایگەیاند، تا ئێستا
بڕیاری راگرتنی دەوامیان نەداوە و بە هەماهەنگی لەگەڵ کەشناسیدا بڕیاری گونجاو دەدەن.
ئەوەش لە کاتێکدایە، ماوەی دوو رۆژە کەشناسی هەرێم گەیشتنی
شەپۆلێکی دیکەی بەفر بارینی لە هەرێم راگەیاندووە و دەڵێت، کە ناوچە گەرمەکانیش دەگرێتەوە
و لە سەنتەری شاری هەولێر و کەرکوکیشدا بەفر دەبارێت، کە کۆتا بەفر لە ساڵی ٢٠١٨دا
لە هەولێر باریوە و لە شاری کەرکویش زیاتر لە ٥ ساڵ دەبێت بەفر نەباریوە.