ئەوەشی خستەڕوو، ژمارەیان نزیکەی ٢٠٠ خوێندکار دەبێت و هاوشێوەی خوێندکارانی دیکەی زانکۆ و پەیمانگاکان نارەزایەتییان هەیە.

باسی لەوەکرد، داواکاری ئەو خوێندکارانە ئەوەیە، کە هاوشێوەی ساڵانی رابردوو دەرماڵەیان بۆ خەرجبکرێت، کە بۆ خوێندکارانی ناوشار بڕی ٣٠ هەزار دینار و بۆ خوێندکارانی دەرەوەی شار بڕی ٥٠ هەزار دینار بوو.

ئەو خوێندکارانە نارەزایەتییان هەیە بەرامبەر ئەوەی، دەبێت ساڵانە خۆیان پێداویستییەکانی کارنامەی دەرچوون "ئەتروحە"یان دابین بکەن، کە وەک خۆیان دەڵێن، "بۆ بەشەکانی شانۆ و شێوەکانی کەرستە و پێداویستییەکانیان گرانە و پارەیەکی زۆر لەسەرمان دەوەستێت، بەهۆی ئەوەی دەبێت پێداویستییەکانی کاری لەسەر دەکەین و کاری پێدەکەین، تەنانەت بەشی شانۆ دیکۆری شانۆکەشمان لەسەر ئەرکی خۆمانە."

ئەو سەرچاوەیە ئەوەشی خستەڕوو، "هەندێک لە مامۆستاکان بەشێوەیەکی زۆر هاوکاریانن بەوەی داوا لە لایەنەکان و کەسایەتییەکان دەکەن بۆئەوەی هاوکاریان بکەن لە دابینکردنی پێداویستییەکانی کارنامەی دەرچووندا، لە کاتێکدا ئەوە ئەرکی حکومەتی هەرێمە ئەو کارە بکات."

ئەوە لە کاتێکدایە، پەیمانگای هونەرە جوانەکانی سلێمانی و وەرزش و چەند پەیمانگایەکی دیکە؛ سەر بە وەزارەتی خوێندنی باڵا نین و سەر بە وەزارەتی پەروەردەن، ئەرکی دابینکردنی دەرماڵە و کارنامەی دەرچوونیشیان لە وەزارەتی پەروەردەوە دەبێت، بەڵام لە ساڵی ٢٠١٤ و هاوتای دەرماڵەی زانکۆ و پەیمانگاکانی سەر بە خوێندنی باڵا، بڕدراوە.

ماوەی زیاتر لە هەفتەیەکە خوێندکارانى زانکۆ و پەیمانگاکانی هەرێم بۆ داواکردنى پێدانى دەرماڵە گردبوونەوە و خۆپیشاندان ئەنجام دەدەن و هێزە ئەمنییەکانیش دارى کارەبایى و گازى فرمێسکڕێژ دژیان بەکاردەهێنن و ئازاری جەستەییان دەدەن و هەندێک خوێندکار لێیان دراوە، جگە لەوەی تەقە بەسەر خوێندکارانیشدا کراوە، کە بەو هۆیەوە چەند خوێندکارێک بریندار بوون.

ئەو خوێندکارانە باس لەوەدەکەن، دۆخ و باری ئابوریان سەختە و دەبێت حکومەت بەدەم داواکانیانەوە بچێت و دەرماڵەکانیان بۆ بگەڕێنێتەوە.

لە ساڵانی رابردوودا، چەندین خوێندکار هەبوون بەهۆی سەختی دۆخی ئابورییەوە وازیان لە خوێندن هێناوە، یان رێگای ئەوروپایان گرتووەتەبەر، یانیش ساڵێکی خوێندنیان کردووەتە مۆڵەت و کاریان کردووە، یانیش کەم خوێندکار هەیە لەگەڵ خوێندنەکەیدا کاری نەکردبێت.

حکومەت بۆ کپکردنەوەی خۆپیشاندانەکان دەوامی زانکۆ و پەیمانگاکانی سەر بە خوێندنی باڵای راگرتووە، بەڵام، خوێندکاران سورن لەسەر داواکارییەکانیان.

لە چەند رۆژی رابردووشدا حکومەتی هەرێم و پەرلەمانی کوردستان ڤیدیۆی ئاڵایەکی کوردستانیان بڵاوکردەوە کە لە بەردەم زانکۆی سلێمانیدا کەوتووەتە سەر شەقام و ئۆتۆمبێل بەسەریدا دەڕوات و چەند خوێندکارێک هەوڵی لابردنی دەدەن، بەڵام ئەوان خوێندکارانی زانکۆیان بەوە تۆمەتبارکرد و ئاماژەیان بەوەکرد، "سوکایەتی بە ئاڵای کوردستان کراوە."

لە ساڵی ٢٠١٤ـەوە دەرماڵەی خوێندکارانی هەرێم لە زانکۆ و پەیمانگاکاندا بڕاوە، کە پێشتر بۆ خوێندکارانی ناوشار بڕی ٤٠ هەزار دینار و بۆ خوێندکارانی بەشە ناوخۆیی بڕی ٦٠ هەزار دینار و بۆ خوێندکارانی دەرەوەی شار کە بەشەناوخۆییان نەبوو بڕی ١٠٠ هەزار دیناریان پێدەدرا، کە وەک خوێندکارانی ئەوکاتە باسیان دەکرد، ئەو بڕە پارەیە لانی کەم کرێی هاتوچۆی لەسەر ئاسان دەکردن.

هـ.ئـ