سەردێڕ:

پاسەوانێکی دیکەی موراد کانی کوردەیی گیانی لەدەستدا

PM:08:43:27/11/2021

14872 جار خوێندراوەتەوە

پاش ئەوەی رۆژی پێنجشەممە، شەڕ و روبەڕوبوونەوەی لە نێوان هێزێکی ئەمنی و عەقید موراد کانی کوردەیی روویدا و خۆی و دوو پاسەوانی گیانیان لەدەستدا، ئێستاش پاسەوانێکی دیکەشی بەهۆی سەختی برینەکەیەوە گیانی لەدەستدا.


رۆژی پێنجشەممە، شەڕ و روبەڕوبوونەوە لە نێوان عەقید موراد کانی کوردەیی ئەفسەر لە بەڕێوەبەرایەتی پۆلیسی راپەڕین و چەند پاسەوانێکی لەگەڵ هێزێکی ئەمنیدا روویدا.

بەهۆی شەڕەکەوە ئەفسەرە پلە باڵاکە و دوو پاسەوانی گیانیان لەدەستدا و ئێستاش سەرکار فاخیر پاسەوانێکی دیکەی لە نەخۆشخانە بەهۆی سەختی برینەکەیەوە گیانی لەدەستدا.

هەر رۆژی پێنجشەممە، ئەنجومەنی ئاسایشی ھەرێم باسی لەوەکرد، "ھێزێکی فەرمی بۆ جێبەجێکردنی بڕیاری دادگا و سەروەریی یاسا بۆ دەستگیرکردنی داواکراو (موراد کانی کوردەیی) لە شاری رانیە بەشێوەیەکی مەدەنی و یاسایی ئەرکی دەستگیرکردنی ناوبراویان پێسپێردرا، بەڵام ئەفسەرەکە پاسەوانەکانی روبەڕوی یاسا بوونەوە و دواتر موراد کانی کوردەیی و دووان لە پاسەوانەکانی کوژران."

لە رۆژی هەینیدا، خانەوادەی موراد کانی کوردەیی راگەیەنراوێکیان بڵاوکردەوە و باسیان لەوەکرد، "تا ئەوکاتەی بڕیاردەر و ئەنجامدەرانی ئەو تاوانە ئاشکرا نەکرێن و رادەستی یاسا نەکرێن، پرسە بۆ کوژراوەکانمان دانانێین."

راشیانگەیاند، "یەکێک لە ھاورێکانیشی بەناوی فرسەت قادر رفێندراوە و چارەنوسی نادیارە."

دواتر، لاهور جەنگی لەسەر رووداوی کوژرانی موراد کانی کوردەیی ڕایگەیاند، داوا لە کەسوکاری شەهیدەکان دەکات دان بە خۆیاندا بگرن و هیچ پەرچەکردارێک نەنوێنن تا ئەو کاتەی دڵنیا دەبنەوە کە لێکۆڵینەوە ناکرێت و ئەنجامدەرانی ئەم کارە دەستگیر ناکرێن.

 

چۆمان مەحمود، هەولێر

No description available.

 

 








گەلەری