سەردێڕ:

ناتۆ بڕیارێکی نوێی لەبارەی سنوری بیلاروسیاوە دەرکرد

PM:11:45:25/11/2021

4000 جار خوێندراوەتەوە

سکرتێری گشتی ناتۆ و سەرۆکی پۆڵەندا لە بارەگای ناتۆ کۆبونەوە و بڕیاریاندا بە درێژكردنەوەی مانەوەی ھێزە سەربازیەكان لەسەر سنوری بیلاڕوسیا.


ئێوارەی ئەمڕۆ پێنجشەممە، جێنس ستۆلتنبێرگ سکرتێری گشتی ناتۆ و ئاندرێج دودا سەرۆککۆماری پۆڵەندا کۆبوونەوە و گفتوگۆیان کرد لەبارەی روداوەکانی ئەمدواییانەی سەر سنورەوە.

لە کۆبوونەوەکەدا تیشکخراوەتە سەر ئەو هێزەی روسیا لە سنوری ئۆکرانیا جێگیری کردووە و سکرتێری گشتی ناتۆ وتی " کۆکردنەوەیەکی گەورە و نائاسایی هێزەکان دەبینین لەلایەن مۆسکۆوە، بۆیە داوا لە روسیا دەکەین کە شەفاف بێت و گرژییەکان کەم بکاتەوە".

ئاماژەی بەوەشکرد، ناتۆ بە ئاگایی دەمێنێتەوە و بەردەوام دەبێت لە دابینکردنی پاڵپشتی سیاسی و پراکتیکی بۆ ئۆکرانیا و ئەوەشی روونکردەوە ئەمە هەڕەشە نییە بۆ سەر روسیا و یارمەتی ئۆکرانیا دەدات کە بەرگری لەخۆی بکات لە هەر پلانێک.

لەبارەی بیلاروسیاشەوە سکرتێری گشتی ناتۆ باسی لەوەکرد، "تەواوی هاوپەیمانانی ناتۆ هاوڕان لەسەر ئەوەی لۆکاشینکۆی سەرۆکی بیلاڕوسیا خەڵکی بەنرخ وەک کەرەستە و چەک بەکاردەهێنێت بۆ فشار خستنە سەر وڵاتانی دراوسێی".

هاوکات، جێنس ستۆلتنبێرگ باسی لەوەشکرد مانەوەی هێزەکانی سەرسنور وەک ئەم دۆخەی ئێستا درێژەی دەبێت و لە حاڵەتی ئامادەباشیدا دەبن بۆ هەر رووداوێکی نەخوازراو.

ئەمەش لە کاتێکدایە ماوەی زیاتر لە مانگێکە، قەیرانی کۆچبەران لەسەر سنوری بیلاڕوسیا پۆڵەندا دروستبووە و خەڵکی لە وڵاتە جیاوازەکانی رۆژهەڵاتی ناوەڕاست و ئەفریقاوە گەشتیان کردووە بۆ بیلاڕوسیا و داوای کردنەوەی سنورەکان دەکەن بۆ گەشتن بە خاکی یەکێتی ئەوروپا.








گەلەری