بەگوێرەی ئامارێکی فەرمیی حکومەتی بەریتانیا، تەنها لەمساڵدا نزیکەی ٢٤ هەزار و ٧٠٠ کۆچبەر بەنایاسایی گەشتوونەتە ئەو وڵاتە، ئەم رێژەیەش سێ هێندەی ئاماری ساڵی ٢٠٢٠ە.

ئەو بەڕێوەبەرەی پێشووی هێزە سنوورییەکانی بەریتانیا ئەوەشی خستوەتەڕوو، "ئەگەر فەڕەنسا رێگری وشکانی دروستنەکات یان کۆچبەران نەگەڕێنێتەوە، ئەوا گرفتەکە وەک خۆی دەمێنێتەوە".

تێپەڕبوونی رێژەیەکی زۆریی کۆچبەران لە رێگای سنووری فەڕەنسا بۆ بەریتانیا، بووەتە هۆی سەرهەڵدانی گرفتی دیپلۆماسی نێوان هەردوو وڵات.

ماوەیەکیشە، دیاردەی کۆچی هاوڵاتییانی هەرێم بۆ بیلاڕوسیا و دواتر بۆ وڵاتانی ئەوروپا دەستیپێکردووە و وەک خۆیان دەڵێن، مەبەستیان دابینکردنی ژیان و داهاتوویەکی باشترە بۆ خۆیان و منداڵەکانیان.

لەمانگی حوزەیرانی ئەمساڵیشدا، پریتی پاتێڵ وەزیری ناوخۆی بەریتانیا، رێککەوتنێکی بە بەهای ٥٤ ملیۆن یۆرۆ لەگەڵ فەڕەنسادا واژۆکرد، بەمەبەستی رێگریکردن لە تێپەڕبوونی کۆچبەران بۆ بەریتانیا لە رێگای فەڕەنساوە، بەڵام چاوگە بەریتانییەکان ئاشکرایانکرد، "کۆنترۆڵکردنی رێگای سەرسنوور بە درێژایی ٩٠ میل لەسەر کەناراوەکان، کارێکی ئەستەمە".

ئەمەش لەکاتێکدایە، ماوەی زیاتر لە مانگێکە قەیرانی کۆچبەران لەسەر سنووری نێوان بیلاروسیا و پۆڵەندا دروستبووە و بەرپرسانی یەکێتی ئەوروپاش سەرۆکی بیلاڕوسیا تۆمەتبار دەکەن بە بەکارهێنانی کۆچبەران وەک چەکێک دژی یەکێتییەکە دوای ئەوەی سزایان بەسەردا سەپاندووە.