باسی لەوەشکردووە، ''ئەو هەواڵانە هەموویان دوورن لە راستییەوە، پۆڵەندا بەردەوام دەبێت لە پاراستنی سنورەکەی لەگەڵ بیلاڕوسیا و ئەوانەشی هەواڵی لەو جۆرە بڵاودەکەنەوە کاردانەوەی خراپی لێدەکەوێتەوە."

حکومەتی پۆڵەندا داواشی لە کۆچبەران کردووە، بە هەواڵی لەو جۆرە هەڵنەخەڵەتێن و هیچ هەنگاوێک نەنێن.

هاوکات، ئێوارەی ئەمڕۆ پۆلیسی پۆڵەندا رایگەیاند، سێ كەسیان دەستگیركردووە، کە دوانیان ئۆكرانی و یەکیان پۆڵەندیە و ھەوڵیانداوە ژمارەیەک پەنابەر بھێننە خاكی پۆڵەنداوە.

ماوەیەکە دیاردەی کۆچی هاوڵاتییانی هەرێم بۆ بیلاڕوسیا و دواتر بۆ وڵاتانی ئەوروپا دەستیپێکردووە و وەک خۆیان دەڵێن، مەبەستیان دابینکردنی ژیان و داهاتوویەکی باشترە بۆ خۆیان و منداڵەکانیان.

ئەو کۆچبەرانە باس لەوەدەکەن، بەهۆی سەختی ژیان و نەبوونی هەلی کار و دامەزراندن و خراپی دۆخی ئابوری و پەککەوتنی زۆرینەی کەرتەکانی ژیان روو لەو وڵاتانە و ئەو رێگا سەختە دەکەن.

کۆچی ئەمجارەی هاوڵاتیانی هەرێم جیاوازە و بە منداڵ و گەنج و پیرەوە لەسەر سنوری بیلاروسیان، لە چەند رۆژی رابردووشدا منداڵێک و مێردمنداڵێکی ١٤ ساڵ بەهۆی سەرماوە لەسەر هەمان سنور گیانیان لەدەستدا، ئەمڕۆش پەیامنێری ئێن ئاڕ تی باسی لەوەکرد، کە ئەڤینی ٣٨ ساڵ بە دووگیانی و دۆخی خراپەوە گەیەندراوەتە نەخۆشخانەیەکی سەر سنور و منداڵەکەی سکی گیانی لەدەستداوە، مەترسی لەسەر ژیانی خۆشی هەیە.