سەرۆکی لیژنەی دانوستانەکانی رەوتی سەدر بۆ پێکهێنانی حکومەتی داهاتووی عێراق رایگەیاند، دانوستانەکان بۆ پێکهێنانی هاوپەیمانییەکان و پێکهێنانی حکومەت بەشێوەیەکی ئارام و ئاسایی بەڕێوەدەچێت.
ئەمڕۆ دووشەممە، حەسەن عەزاری سەرۆکی لیژنەی دانوستانەکانی رەوتی سەدر بۆ پێکهێنانی حکومەتی داهاتووی عێراق لە تویتەری خۆی پەیامێکی بڵاوکردەوە و تیایدا هاتووە، "رێڕەوی دانوستانەکان بۆ پێکهێنانی حکومەتی داهاتووی عێراق بەشێوەیەکی ئاسایی و ئارام دەڕۆن".
لە هەڵبژاردنی رۆژی ١٠ی ئەم مانگەدا، رەوتی سەدر بە رێبەرایەتی
موقتەدا سەدر توانی ٧٣ کورسی بەدەستبهێنێت و ببێت بە یەکەم حزبی پەرلەمانیی لە پەرلەمانی
عێراق و لە ئێستاشدا سەرقاڵی دانوستانە لەگەڵ لایەنەکانی دیکە بۆ پێکهێنانی حکومەتی
نوێی عێراق.
هەر ئەمڕۆش؛ وەفدێکی پارتی سەردانی شاری سلێمانی کرد و لەگەڵ
یەکێتی نیشتیمانی کوردستان کۆبووەوە و هەردوولاشیان جەختیان لەوەکرەوە، "کە لە
بەغدا بەیەکڕیزی کار دەکەن".
هاوکات، ئەمڕۆ جوڵانەوەی نەوەی نوێش کە لە هەڵبژاردنەکەی
ئەمساڵدا توانی نۆ کورسی بەدەستبهێنێت رایگەیاند، "بەشداری لە حکومەتی
داهاتووی عێراقدا ناکەن و هەموو پۆستە وەزارییەکانیش رەتدەکەنەوە".
رۆژی ٨ و ١٠ی ئەم مانگە، دەنگدانی گشتی و تایبەت، لەسەرانسەری
عێراقدا بەڕێوەچوو و دواتریش، کۆمسیۆنی باڵای سەربەخۆی هەڵبژاردنەکان ئەنجامی کۆتایی
راگەیاند و وتی، "تەواوی بەراوردکارییەکانی دەنگدانی دەستی و ئەلیکترۆنی
هاوتابوون".