وەزیری دەرەوەی روسیا لە سەردانەکەیدا بۆ عێراق سەردانی هەرێم ناکات و تەنها سەردانی بەغدای کردووە.
عومەر بەرزنجی بریکاری وەزیری دەرەوەی عێراق بە ئێن ئاڕ تی راگەیاند، شاندی روسیا کە لە چەند بەرپرسێکی ئەو وڵاتە و چەند گەورە کۆمپانیایەکی بواری غازی روسی پێکهاتووە و سێرگی لاڤرۆڤ وەزیری دەرەوەی ئەو وڵاتە سەرپەرشتی دەکات سەردانی هەرێم ناکات.
ئەمڕۆ شاندی روسیا بە سەرپەرشتی وەزیری دەرەوەی
ئەو وڵاتە سەردانی عێراقی کرد و لەگەڵ هەر سێ سەرۆکایەتییەکەی عێراق و وەزیری دەرەوە
کۆبووەوە و باس لە گرنگی پەیوەندییە هاوبەشەکانی هەردوولا و دۆسیەی نەوت وزە کرا.
ئەحمەد سەحاف وتەبێژی وەزارەتی دەرەوەی عێراق
پێشتر رایگەیاندبوو، ئامانجی ئەم سەردانەی شاندی روسیا بۆ دووپاتکردنەوەی دەروازەی
کراوەی عێراقە بە رووی هەموو هاوبەشەکانی و گرنگی پەیوەندییە ستراتیجییەکان لەگەڵ
لایەنی روسی لە پەرەپێدانی وەربەرهێنان و ئابوری بە تایبەتی لە کەیسەکانی وزەدا و وتیشی،
"هەردوولا لەبارەی کەیسەکانی گەشەپێدانی سەرجەم کەرتەکان گفتوگۆ دەکەن."
سەحاف ئاشکراشیکرد، سەردانی شاندی روسیا بۆ عێراق
لە پێناو توێژینەوەیە لەسەر گرنگترین بەرەوپێشچوونەکانی ئاستی ناوچەکە و رابەرایەتی
تێڕوانینی هاوبەش و دۆزینەوەی لێکچوونی سەرەکی نێوان هەردوولا لە گرنگترین ئاڵنگارییەکان
کە پێویستە هەریەکە لە روسیا و عێراق بە هاوبەشی کاری لەسەر بکەن.