سەردێڕ:

بانکی ناوەندی هەنگاوەکانى گۆڕانکاریى لە نرخى دۆلار ئاشکرا کرد

AM:09:21:04/09/2021

137420 جار خوێندراوەتەوە

جێگری پارێزگاری بانکی ناوەندی رایگەیاند، گۆڕانکاری لە نرخی دۆلاردا هەنگاوێکی تاوتوێ کراو بووە و گۆڕانکارییەکە دوای خوێندنەوەی زۆری وەزارەتی دارایی و بانکی ناوەندی ئەنجام دراوە.


ئیحسان یاسری، جێگری پارێزگاری بانکی ناوەندی رایگەیاند، بانکی ناوەندی گەیشتووەتە نرخی ئێستای دۆلار کە نرخی سیاسەتی دارایی وڵاتە کە هەر دۆلارێك بە ١٤٥٠ دینار بیکڕێت و بە ١٤٦٠ دینار بیفرۆشێت و لەناو خەڵکیشدا بە ١٤٧٠ دینار مامەڵەی پێوە بکرێت.

ئاماژەی بەوەشداوە، گۆڕینی نرخی دۆلار کاتی زۆر پێویستە و دەبوایە لە ساڵی ٢٠١٠دا ئەو بڕیارە بدرێت و جێبەجێ بکرێت.

یاسرى هیواخواز بوو نرخی دۆلار جێگیر بکرێت، بەردەوام بێت و چالاکی ئابووری بگەڕێنێتەوە لەژێر ڕۆشنایی ئەو نرخەی ئێستای.

ئەوەشی خستوەتەڕوو، پڕکردنەوەی کورتهێنانی بودجە بەهۆی باشبوونی نرخی نەوتەوە یارمەتی کورتهێنانی دارایی دەدات و باوەڕ ناکرێت تا کۆتایی ساڵ ئەو گرفتە چارەسەر بکرێت.

جێگری پارێزگاری بانکی ناوەندی رونیکردەوە، پێشنیازکراوە جیاوازی نرخی نەوت و داهاتەکەی بەکاربێت بۆ پرۆژەکان و پارێزگاکان، بەڵام بۆچوونی حکومەت و پەرلەمان و دەسەڵاتی دارایی ئەوەیە کە کورتهێنانی بودجە لەسەرو هەموو پڕۆژەیەکی ترەوە چارەسەر بکرێت.

ئەمە لەکاتێکدایە، لە مانگی کانوونی یەکەمی ساڵی رابردوو بە بڕیارێکی حکومەتی ناوەندی بەهای دۆلاری ئەمەریکی بەرزکرایەوە و نرخی هەر دۆلارێك بە ١٤٥٠ دینار جێگیرکرا و لە مانگی ئازاری ئەمساڵیشدا لە پڕۆژە یاسای بودجەدا ئەنجومەنی نوێنەرانی عێراق نرخی دۆلاری بەهەمان نرخی بانکی ناوەندی جێگیرکرد.








گەلەری