دەستەی دەستپاکى عێراق رایگەیاند، لە ماوەی شەش مانگی یەکەمی ئەمساڵدا چوار ملیار و ٩٢٠ ملیۆن دۆلار و ٤٥٣ ملیار دیناریان گەڕاندووەتەوە بۆ خەزێنەی حکومەت.
دەستەی دەستپاکى عێراق لە راپۆرتێکدا کار و چالاکی شەش مانگی یەکەمی ئەمساڵی دەستەکەی خستەڕوو و بەپێی راپۆرتەکە لەو ماوەیەدا چاویان بە ٢٥ هەزار و ٤٩٠ ئاگاداركردنەوە و هەواڵ و كەیسی تاواندا خشاندووەتەوە و بەهۆیانەوە رێگە لە بە هەدەردانی ئەو بڕە پارانە گیراوە و گەڕێندراوەتەوە بۆ خەزێنەی حكومەت.
جەختی لەوەشكردووەتەوە، لەو چوارچێوەیەشدا هەزار و ٧٧٥ تۆمەتبار
رادەستی دادگاكان كراون و ٨٥٨ فەرمانی دەستگیركردن دەركراون و ٤٥٥یان جێبەجێكراون،
هاوکات، فەرمانى بانگهێشتكردنی دادوەریی بۆ سێ هەزار و ٢٠٨ کەس دەرکراوە و ٦٧٥ پەڕاوی
راگرتن دەركراون.
دەستەکە باسی لەوەشکردووە، زیاتر لە ٨٧٪ی بەرپرسانی باڵای
وڵات بەدەم داواکاری دەستەکەوە هاتوون بۆ ئاشکراکردنی سامانەکانیان.
ئەوەش لەکاتێکدایە، لە هەرێمی کوردستانیش بەردەوام راپۆرت
و بەڵگەنامەکان دەریدەخەن کە گەندەڵی ئەنجام دەدرێت و سامانی گشتی بە فیڕۆدەدرێت،
بەڵام رۆڵی تەواو بە دادگاکان نەدراوە و کەس لەسەر ئەو بابەتە سزانەدراوە.