فه‌رمانگه‌ی میدیا و زانیاری حکومەتی هەرێم رایگەیاند، ئەنجومەنی وەزیرانی هەرێم لەبارەی هاوردەکردنی ئاژەڵەوە چەند بڕیار و رێکار و میکانیزمی دەرکرد.
ئەمرۆ سیشەممە، فه‌رمانگه‌ی میدیا و زانیاری حکومەتی هەرێم راگەیەنراوێکی بڵاوکردەوە و تیایدا هاتووە، دوای كۆبوونه‌وه‌ی ئه‌نجومه‌نی وه‌زیرانی هه‌رێمی كوردستان، له رێكه‌وتی ٢٢ی حوزه‌یرانی ٢٠٢٢، چه‌ند بڕیارێك ده‌رچوو سه‌باره‌ت به رێكار و میكانیزمه‌كانی هاورده‌كردنی ئاژه‌ڵ به‌م شێوه‌یه‌ی خواره‌وه:
یه‌كه‌م: هه‌ڵپه‌ساردنی
كاركردن به مه‌رجی "مۆڵه‌تی هاورده‌كردن" بۆ هاورده‌كردنی ئاژه‌ڵ تاكو رێكه‌وتی
١٧ی تشرینی یه‌كه‌می ٢٠٢٢، به ره‌چاوكردنی ئه‌م مه‌رجانه‌ی خواره‌وه:
١. جێبه‌جێكردنی
سه‌رجه‌م مه‌رج و رێنماییه‌كانی وه‌زاره‌تی كشتوكاڵ و سه‌رچاوه‌كانی ئاو له
هاورده‌كردنی ئاژه‌ڵ، تایبه‌ت به رێكاره ڤێته‌رنه‌رییه‌كان و مه‌رجی پشكنین و كه‌ره‌نتینه‌كردن
له ده‌روازه سنوورییه‌كان و كه‌ره‌نتینه‌ی فڕۆكه‌خانه‌كانی هه‌ولێر و سلێمانی.
٢. وه‌زاره‌تی
كشتوكاڵ و سه‌رچاوه‌كانی ئاو میكانیزم و پلانی هاورده‌كردن رێك دەخات، به له‌به‌رچاوگرتنی
به‌رهه‌می ناوخۆی خاوه‌ن ئاژه‌ڵ و پێداویستی بازاڕ و پاراستنی سامانی ئاژه‌ڵ له بڵاوبوونه‌وه‌ی
نه‌خۆشی و نه‌بوونی كاریگه‌ری نه‌رێنی له‌سه‌ر سامانی ئاژه‌ڵی ناوخۆیی.
٣. ره‌چاوكردنی
دۆخی كه‌می له‌وه‌ڕگه‌كان و كه‌می ئالیك و مادده عه‌له‌فییه‌كان و نرخه‌كانیان كه
بارگرانی دروست ده‌كات بۆ سه‌ر خاوه‌ن ئاژه‌ڵی ناوخۆ.
٤. هاورده‌كردنی
ئاژه‌ڵی زیندوو به پێی ئه‌م بڕیاره بۆ دابینكردنی گۆشتی سوو‌ر له بازاڕه‌كانی
هه‌رێمدا.
دووه‌م: وه‌زاره‌تی كشتوكاڵ
و سه‌رچاوه‌كانی ئاو پێداچوونه‌وه‌ی پێویست ده‌كات به ده‌ره‌نجامه‌كانی جێبه‌جێكردنی
ئه‌م بڕیاره له دوای رێكه‌وتی ١٧ی تشرینی یه‌كه‌می ٢٠٢٢، واتا دوای ته‌واوكردنی
ماوه‌ی جێبه‌جێكردنی بڕیاری ١٤٥ی تایبه‌ت به هاورده‌كردنی ئاژه‌ڵ له رێگه‌ی هه‌ڵسه‌نگاندنی
ده‌ره‌نجامه‌كانی له‌و ماوه‌یه‌دا و به‌رزكردنه‌وه‌ی ڕاپۆرت و پێشنیاری پێویست بۆ
ئه‌نجومه‌نی وه‌زیران له لایه‌ن وه‌زاره‌ته‌وه.