ئاماژەی بەوەشداوە، کۆبوونەوەکە تایبەت بوو بە گفتوگۆکردن دەربارەى کەیسى هەریەک لە مامۆستایانى کوژراوی زانکۆی سەڵاحەدین "کاوان ئیسماعیل" راگری کۆلێژی یاسا و "ئیدریس حەمە خان" مامۆستا لە کۆلێژی ئەندازیاری.

راگەیەنراوەکە ئاماژەی بەوەشداوە، "لەم کۆبونەوەیەدا ئەنجومەنى وەزارەتى خوێندنى باڵا و توێژینەوەى زانستى جەختى کردەوە، کەیسى کوشتنی مامۆستایانى زانکۆى سەڵاحەدین - هەولێر، کەیسی وەزارەتەکەمان و تاک بەتاکی مامۆستایانى کوردستانە، چونکە بەزاندنى حەرەمى زانکۆ دەست بردنە بۆ پیرۆزییەکانى خوێندن و شێواندنى کلتور و بەهاو نۆرمە نیشتمانییەکانمان".

دەشڵێت، ئەنجومەنى وەزارەت دڵنیایى دەدات بەسەرجەم کۆمیونیتى ئەکادیمى کوردستان و هەموو خەڵکى کوردستان کە پێکەوە کار دەکەن بۆ پاراستنى سەروەرى یاسا و بەدیهێنانى دادپەروەرى.

راگەیەنراوەکە ئاماژەی بەوەشداوە، ئەنجومەنى وەزارەت داوا لە هەموو لایەنەکان دەکات کە هاوکارى دادگا بن بۆ سەلامەتى پرۆسەى لێکۆڵینەوەکان تاوەکو بە بڕیارێکى دادپەروەرانە ماف بۆ مافخوراوان بگەڕێندرێتەوە و سەبورى کەسوکارى قوربانیان بدرێت.

راگەیەنراوەکە باسی لەوەشکردووە، هەر لە کۆبونەوەکەدا ئەنجومەنى وەزارەت بڕیارى پێویستى دا بۆ ئەنجامدانى رێکارى پەروەردەیى و زانستى و یاسایی، بۆ رێگەگرتن لە دووبارە بونەوە و تەشەنەسەندنى ئەم رووداوە دڵتەزێنانە، بۆ ئەم مەبەستەش وەزارەتى خوێندنى باڵا و توێژینەوەى زانستى لیژنەى پەروەردەیى و زانستى و یاسایى بۆ بەدواداچونى رەهەندە جیاجیاکانى ئەم رووداوە نەخوازراوە پێکهێناوە.

لە کۆتایی راگەیەنراوەکەشداهاتووە، ئەنجومەنى وەزارەتى خوێندنى باڵا و توێژینەوەى زانستى دڵنیایى دەدات هەموو هەوڵێک دەخەنەگەڕ، لەپێناو پاراستنى ناوەندەکانى خوێندن و شکۆى مامۆستایان و ژینگەى خوێندن، بۆ ئەم مەبەستەش داوایان لە پەرلەمانى کوردستان و سەرجەم دامەزراوەکانى حکومەت و ئەنجومەنى دادوەرى و رێکخراوەکانى کۆمەڵگەى مەدەنى و کۆمیونیتى ئەکادیمى کوردستان هەیە، کە لەم پرسەدا هاوکار و هەماهەنگى وەزارەت و ناوەندە زانستییەکانبن.

ئەمە لەکاتێکدایە، رۆژی سێشەممە ریکەوتی ٢٨ی ٦ی ٢٠٢٢ هەریەک لە کاوە ئیسماعیل راگری کۆلێژی یاسا و ئیدریس حەمە خان مامۆستا لە کۆلێژی ئەندازیاری زانکۆی سەڵاحەدین لەلایەن خوێندکارێکی زانکۆی سۆرانەوە کوژران و دوای چەند کاتژمێرێک لە رووداوەکە لەلایەن هێزەکانی ئاسایشەوە دەستگیرکرا.