سەردێڕ:

ئۆکرانیا: هێزەکانمان لە سنوری روسیا نزیکبوونەتەوە

PM:05:06:16/05/2022

6744 جار خوێندراوەتەوە

وەزارەتی بەرگری ئۆکرانیا رایگەیاند، ئەو هێزانەی وڵاتەکەی کە بەرگری لە شاری خارکێڤ دەکەن توانیویانە سوپای روسیا لە شارەکە دەربکەن و بەرەو سنورەکانی روسیا پێشڕەوی بکەن.


وەزارەتی بەرگری ئۆکرانیا لە راگەیەندراوێکدا ئاماژەی بەوەکردووە، فەوجی ٢٢٧ی لیوای ١٢٧ی هێزەکانی بەرگری ئۆکرانیا گەیشتوونەتە سنووری وڵاتەکەیان لەگەڵ روسیا و وتیشی "پێکەوە بەرەو سەرکەوتن دەڕۆین."

وتوشیەتی، "سوپاسی هەموو ئەوانە دەکەین کە ژیانی خۆیان دەخەنە مەترسییەوە و ئۆکرانیا لە دەستی داگیرکەرە رووسییەکان رزگاردەکەن."

هاوکات، وەزارەتەکە لە تۆڕی کۆمەڵایەتی فەیسبووک گرتە ڤیدیۆیەکی بڵاوکردۆتەوە و تیایدا ١٢ سەربازی ئۆکرانی لە سەنگەرێکی سەر سنووری نێوان ئۆکرانیا و روسیا بە رەنگەکانی ئاڵای ئۆکرانیاوە دەردەکەون.

ئەمەش لە کاتێکدایە، نزیکەی سێ مانگە جەنگی نێوان روسیا و ئۆکرانیا بەردەوامە و روسیاش وەستاندنی هێرشەکانی بەستووەتەوە بە پاشگەزبوونەوەی ئۆکرانیا لە داوای بوون بە ئەندامی لە رێکخراوی باکوری ئەتڵەسی ناتۆ.













گەلەری