ئاماژەی بەوەشداوە، لەو ژمارەیە تا ئێستا هەشت حاڵەتی گیانلەدەستدان بەهۆی ئەو نەخۆشییەوە تۆمارکراون کە پێنج حاڵەتیان لە پارێزگای زیقار تۆمارکراون.

سەیف بەدر ئەوەشی خستووەتەڕوو، وەزارەتی تەندروستی چاودێری هەموو حاڵەتێکی توشبوون و گومانلێکراوانی نەخۆشییەکە دەکات، هەربۆیە تاقیگەی پزیشکی تایبەت بە دیاریکردنی ئەو نەخۆشییەی دابینکراوە.

دەشڵێت، ئەگەر نەخۆشییەکە لە سەرەتادا دیاریبکرێت ئەوا چارەسەرەکەی ئاسانتر دەبێت و بەپێچەوانەشەوە ئەگەر خوێن لەژێر پێستیدا بڵاوبوبێتەوە بەهۆی درەنگ وەرگرتنی چارەسەری، ئەگەری گیانلەدەستدانی زیاترە.

تای خوێنبەربون، "پەتایەكی ڤایرۆسیی"ە واتە گوازراوەیە، بەهۆی تێكەڵاوبون و لەڕێی ئاژەڵ و مێش و مەگەزەوە بۆ مرۆڤ دەگوازرێتەوە، هەروەها لە مرۆڤەوە بۆ مرۆڤیش دەگوازرێتەوە.

بەگوێرەی رێکخراوی تەندروستی جیهانی و وەزارەتی تەندروستی عێراق لە نیشانەكانی تای خوێنبەربون، دڵ تێكهەڵاتن و رشانەوە، ئازاری جومگەكان، سكچون، تا، هیلاكی و لاوازی.

هەروەها، چەند نیشانەیەكی نەخۆشییەكە دەریدەخات كە مەترسی لەسەر ژیانی توشبووەكە هەیە، وەک خوێنبەربونی ژێر پێست، دروستبوونی كێشە لە دەماغ، بێهۆشبوون، لەكاركەوتنی گورچیلە، دروستبونی كێشەی هەناسەدان و لەكاركەوتنی جگەر.

لە دیارترین رێگەی گواستنەوەی پەتای تای خوێنبەربوون، كاركردن یان تێكەڵبون لەگەڵ كەسانی توشبوو، سەربڕین و خواردنی ئاژەڵی توشبوو، بەكارهێنانی دەرزیی و ئامێری بەكارهاتوی کەسی توشبوو و سێكسكردن لەگەڵ كەسانی توشبوو بەبێ خۆپارێزی.

هەروەها، مێش و مەگەز، جرج و مشك، شەمشەمەكوێرە و گەنە هۆكاری سەرەكی بڵاوبونەوەی تای خوێنبەربونن، لەگەڵ مرۆڤی توشبوش.

بەپێی رێنماییەكانی رێكخراوی تەندروستی جیهانی و وەزارەتی تەندروستی عیراق، بۆ خۆپارێزی لە تای خوێنبەربوون پێویستە گۆشت بە باشی دابپۆشرێت و بیپارێزرێت لە مێش و مەگەز، دوركەوتنەوە و خۆپارێزی لە كەسانی توشبوو، بە باشی پاككردنەوەی سەتڵی خۆڵ و خاشاك و داپۆشینی، لەگەڵ دانانی تەلمێش بۆ دەرگا و پەنجەرە.

هاوکات، وەزارەتی تەندروستی عێراق و رێكخراوی تەندروستی جیهانی، رێنمایی هاوڵاتییان دەكەن چیمەنی ماڵەكانیان ببڕن، لە پێناو رێگریی لە مێش و مەگەز و بڵاوبونەوەیان.