سەردێڕ:

پاش کێڵانی؛ زەوی گوڵاڵە سورەکانی رانییە دەکرێت بە چی؟

PM:01:37:06/05/2022

14060 جار خوێندراوەتەوە

خاوەنی ئەو زەوییەی بە زەوی گوڵاڵە سورەکانی رانیە ناسراوە بۆ ئێن ئاڕ تی رایگەیاند، بەهۆی ئەوەی زەوییەکە لەلایەن هاوڵاتییانەوە شێوێندراوە، هاوڵاتییانی گوندەکە کێڵاویانە و ئەگەری هەیە بیکەن بە ترۆزی.


شوان خاوەنی زەوییەکەیە و لە لێدوانێکدا بۆ ئێن ئاڕ تی باسی لەوەکرد، سەردانکردنی هاوڵاتیان بە شێوەیەکی زۆر بوو کە ئاستەنگی بۆ دانیشتووانی گوندەکە دروستکردبوو و شەوانەش خەڵک دەچوونە ناوییەوە.

ئاماژەی بەوەشکرد، هاوڵاتیان بە شێوەیەک چووبوونە ناو گوڵاڵە سورەکان کە زیانیان لە دەغڵ و دانی چواردەورەکەشی دابوو، بەوهۆیەوە خەڵکی گوندەکە بڕیاری کێڵانەوەی زەوییەکەیان داوە.

ئەوەشی خستەڕوو، کێڵانەکە لەسەر داواکاری خەڵکەکە بووە و ئەویش رازی بووە، بۆیە خەڵکەکە هەستاون بە کێڵانەوەی.

باسی لەوەشکرد، لە هەندێک شوێن باس لە داوای یاسایی دەکرێت ئەگەر شتی واهەبوو، حکومەت دەتوانێت لێکۆڵینەوە بکات کە چەند زیان بە دەغڵ و دان و بەرهەمەکانی چواردەوری گەیشتووە.

ئەوەش دوای ئەوە دێت، لە نزیک گەناوی قوڕەگۆ لە دەڤەری راپەڕین، پارچەیەک زەوی بەشێوەیەکی چڕ گوڵاڵەسوری لێڕوابوو و ئەوەش سەرنجی گەشتیارانی راکێشابوو و هاوڵاتیان بۆ گەشت و سەیران دەچوونە ئەو ناوچەیە و رەسمیان لەلای گوڵاڵە سورەکان دەگرت، بەڵام بەهۆی سەردانکردنی زۆرەوە و دروستبوونی قەرەباڵغی بەشێکی زەوییەکان و دەغڵ و دانی ناوچەکە شێوابوو.

باخان تۆفیق، رانیە

هـ.ئـ













گەلەری