سەردێڕ:

ئەمریکا: دبلۆماتکارەکانمان دەگەڕێنەوە ئۆکرانیا

AM:08:23:25/04/2022

3148 جار خوێندراوەتەوە

وەزیری دەرەوەی ئەمریکا رایگەیاند، لەم هەفتەیەوە دبلۆماتەکارەکانی وڵاتەکەی بەشێوەی پلەبەندی دەگەڕێنەوە بۆ کیێڤی پایتەختی ئۆکرانیا. دەشڵێت، "واشنتۆن بڕی ٧١٣ ملیۆن دۆلاری وەک کۆمەکی سەربازی دەداتە ١٥ وڵاتی ئەوروپی و لەو پارەیەش بڕی ٣٢٢ ملیۆن دۆلاری دەدرێتە ئۆکرانیا".


ئاژانسی هەواڵی ئاسۆشیەتد پرێس لە زاری ئەتۆنی بلینکن وەزیری دەرەوە و لوید ئۆستن وەزیری بەرگری ئەمریکاوە بڵاویکردەوە، واشنتۆن بڕی ٧١٣ ملیۆن دۆلار وەک کۆمەکی سەربازی بۆ پڕچەک کردنی ئۆکرانیا و ١٥ وڵاتی دیکەی ئەوروپی تەرخان کردووە.

ئاماژەی بەوەشداوە، لەو بڕە پارە تەرخانکراوە ٣٢٢ ملیۆن دۆلاری دەدرێتە ئۆکرانیا و ئەوەشی دەمێنێتەوە بەسەر ١٥ وڵاتەکەی دیکەی ئەوروپیدا دابەشدەکرێت.

لەلایەکی دیکەوە، ئەنتۆنی بلینکن وەزیری دەرەوەی ئەمریکا ئاشکرای کرد، بەشێوەیەکی پلەبەندی بەرپرسە دبلۆماتکارەکانی وڵاتەکەی دەگەڕێنەوە کیێڤ و ئەمریکا باڵیۆزخانەکەی لەو وڵاتەدا دەکاتەوە.

ئاماژەی بەوەشداوە، لەم هەفتەیەوەدبلۆماتکارە ئەمریکییەکان دەست بەگەڕانەوە بۆ ئۆکرانیا دەکەن.

ئەمە لەکاتێکدایە، ئێوارەی دوێنێ هەریەک لە ئەنتۆنی بلینکن وەزیری دەرەوە و لوید ئۆستن وەزیری بەرگری ئەمریکا بەسەردانێکی فەرمی گەیشتنە کیێڤی پایتەختی ئۆکرانیا و لەگە ڤۆڵۆدیمیر زیلینکسی سەرۆکی ئەو وڵاتە کۆبوونەوە.













گەلەری