سەردێڕ:

دەربارەی جەوھەری نائیسلامی پەلاماردانی کورد و ئەرکی موسوڵمان و ئیسلامخوازی کوردستانی

10/13/2019 10:43:02 PM
11256 جار خوێندراوەتەوە
ئەبوبەکر کاروانى
+ -

لە دیدی ئیسلامیەوە ، لەسیاسیەتدا ، زوڵم‌و دادپەروەری، زیان ‌و بەرژەوەندی‌و ھاوشێوەکانیان پێوەر ی ڕیزبەندی وداوەریکردنن. نەک (کوفر) و (ئیمان).  ھەر لەسەر ئەم بناغەش، ستەمی موسڵمان یاخود ئیسلامیەک ، نەک ھەر ڕەوا نیە، بەڵکو قێزەونترە، بە حوکمی ئەوەی  تێکەڵ بەناوی خوا‌و ئیسلام‌و پیرۆزییەکانی دەبێت.
 ھەربۆیە تۆ بۆت ھەیە بەرامبەر موسڵمانێکی دەستدرێژیکار ، بەرگری لە خۆت بکەیت : [فَإِن بَغَتْ إِحْدَاەُمَا عَڵی الْڕُخْرَیٰ فَقَاتِلُوا اڵّتِی تَبْغِی ... ] . کورد سەد ساڵ زیاترە  دووچاری (بغی) بۆتەوەو زوڵمی لێدەکرێت. لێرەشەوە ،ئیسلامی بوونی سەرۆکی تورکیاو دەسەڵاتدارانی  ئەووڵاتەو ھەر وڵات وھێزێکی تر ، ھیچ لە سروشتی دەستدرێژیکارانەی ھەڵمەتی سوپاکەیان دژبە گەلی کوردستان وخواست ومافەکانی ، بەمافی سەربەخۆبوونیشەوە ناگۆڕێت .  دینی ‌و نادینی بوونی پەکەکە وھەرھێزێکی تری کوردستانیشش ،  ھیچ لە عادیلانە بوونی مەسەلە ی کورد ناگۆڕێت. چونکە خۆیان ھەرچی بن ، نوێنەری مەسەلەیەکی ڕەوان کە مەسەلەی کوردە.  لەم چوارچێوەدا دەکرێت وھەندێ جار پێویسە،  لەسەر ھەڵە سیاسیەکانی پەکەکەو پەیەدەو ھێزەکانی تر  بووەستین وڕەخنە لە تەکتیک وشێوازی خەبات وجۆری بەڕێوە بردنی ململانێکان و شرۆڤە سیاسی ودیاریکردنی ھاوپەیمانیەتیەکانیان بگرین  .وەک بەشێک لە خزمەتکردنمان بە بزوتنەوەی سیاسی گەلەکەمان لە پارچەجیاوازەکانی  کوردستاندا.. ئێمەش یەکێ لەو  قەڵەمانە بووین لە ڕابردوودا ئەو ئەرکە نەتەوەییەمان ئەنجام داوە. ئەمە جیاوازە لە کەمتەرخەمی بەرامبەر مەسەلەی نەتەوەکەمان بەپاساوی فیکری جیاواز یاخود ئەدای خراپی سیاسی ھێزەکان. ھەر لەم چوارچێوەدا و بۆ بەرچاوڕوونی زیاتر  دەکرێت  لە پەیوەندی بە ئیسلام  وسەرجەم ئەو لەشکرکێشیانەی دەکرێنە سەرمان، پەلاماری ئەمجارەی تورکیا بۆسەر ڕۆژئاوا بە نموونە وەربگرین و، سەرنج  بۆلای ئەم خاڵانەی لای  خوارەوە  ڕابکێشین:
١.    تورکیا وڵاتێکی نەتەوەییە. بەرژەوەندی نەتەوەیی خۆی چۆن بخوازێت وادەکات.
٢.    سوپای تورکیا سوپایەکی نەتەوەییە ‌و بۆ شکۆمەندی تورک‌و تورکیا شەڕدەکات .
٣.    خاکی تورکیا  یەکسان نیە بەخاکی موسڵمانان  ‌و نەتەوەی تورکیا نەتەوەی ئیسلامی نیە ‌و دەوڵەتی تورکیاش خەلافەتی ئیسلامی نیە. بەڵکو ھەموو ئەوانە بەرھەمی مۆدێرنەی خۆرئاوا وکەمالیزمن.
٤. لە ھەرکات وشوێنێکدا   دەوڵەت‌و سوپای تورکیا ھەست بکەن بەرژەوەندی نەتەوەییان دەیخوازێت ، ھەرگیز گوێ بە عەقیدەی  ھێزی  بەرامبەر نادەن. مەگەر لە ئێستادا ھەزاران سەرپۆش بەسەر ‌و پیاوی موسڵمان ‌و پابەندی جەماعەتی گوڵەن لە زیندانەکانی تورکیادا نین، لەبەر ئەوەی جوڵانەوەکەیان تۆمەتبارە بە بەشداریکردن لە کودەتا سەربازییەکەدا؟ مەگەر تورکیا پەیوەندی لەگەڵ ئیسرائیل نیەو ساڵەھای ساڵ ئیسرائیل یارمەتی تورکیای نەداوە  لە شەڕی دژبە پەکەکەدا‌و، (٥)ملیار دۆلار قەبارەی بازرگانی نێوانیان نیە؟ ھەر بۆیە ئەگەر ھێزێکی ئیسلامی چەکداری کوردیش داوای مافەکانی گەلەکەی بکات وملکەچی خواستەکانیان نەبێت ‌، بێ ھیچ دوودڵیەک شەڕیان لەگەڵ دەکات وھەوڵی تەفروتونا کردنیان دەدا. چونکە ئەوە لۆژیکی دەوڵەتی نەتەوەیە کە کێشەی لەگەڵ فرەنەتەوەیی ناوی ھەیەو ئامادە نیە وەک ئەوەی پێویستە دان بە ناسنامە نتەوەییە جیاوازەکانی ناویدا بنێت.
٥.    ئەگەر رەخنەی تورکیا لە پەکەکە عەقیدەی پەکە کەیە نەک مەسەلەی کورد، خۆ لە بنەڕەتدا پەکەکە دژ بەنیزامێکی عەلمانی نەتە وەپەرستی داپڵۆسێنەر‌و کەمالیزم سەریھەڵدا‌وەو دواتر خەباتی چەکداری دەست پێکردووە. واتە لەسەردەمی داد‌و گەشەپێداندا ودژبە دەوڵەتێکی ئیسلامی دروست نەبووە،  ھەربۆیە کێشەی دەسەڵاتدارانی ئێستای تورکیا لەگەڵ پەکەکە سیاسیە نەک دینی. دین وەک ئامرازی ململانێی سیاسی تێکەڵ بەپرسەکە کراوە. مەگەر چەندین جار لەگەڵیان دانەنیشتن ‌و گفتوگۆیان لەگەڵ نەکردن لە چوارچێوەی پرۆسەی ئاشتیدا؟ ئایە قەت بیستووتانە داوایان کردبێت پەکەکە واز لە عەقیدەی خۆی بێنێ؟ یاخود داوایان لێکردوون چەک دابنێن‌و لەگەڵیان رێکبکەون ‌و دواتر کاری سیاسی ئاشتیخوازانە بکەن؟
٦.    ئەگەر (دین) و (نادین) پێوەری سیاسەتکردن بێت دەی خۆ  حیزبەکەی ئەتاتورک (جەھەپە) کە لە مێژووی نوێدا شت نەماوە بە ئیسلام و ئیسلامیەکانی ئەو وڵاتە ی نە کات   ھێزی گەورەی ئۆپۆزسیۆنە؟ چەندەھا ناوەند‌و کەس ھەر لەم چوارچێوەدا ھەن بۆ رێگا بەبوونیان دەدەن؟ لەوەش سەیرتر ئەم پارتە پشتیوانی لە سەرۆک وھەڵمەتەکەی سوپا دەربڕی.پرسیار لێرەشدا ئەوەیە تۆبڵێی ئەم پشتیوانی دەربڕینە لەسۆنگەی سروشتی دینی شەڕەکەوە بێت؟!
بۆیە دەبێت بەرچاو ڕوون بین، راستە  چەپ بوونی پەکەکە  لەھەندێ ڕوەوە   بۆلێدانی مەسەلەی کورد بەکارھێنراوە وزیانمان لێکردووە کەئێرە جێگەی ئەو باسە نیە، بەڵام بەکارھێنانی ناوی ئیسلام‌و  خوێندنی سورەتی (فتح) لە مزگەوتەکانی تورکیادا ، سروشتی نەتەوەیی شەڕەکە ناگۆڕێت‌و سوپای تورک ناکات بە ڕیزی باوەڕداران‌و بەرامبەرەکانی بە بێباوەڕ ‌و موشریک. چونکە ئەو سوپایە ، بە درێژایی مێژووی نوێ سوپای زوڵم بووە، سوپای دژایەتی ئیسلام و (کورد) ودیموکراسی بووە.
٧.     تێکەڵکردنی ناوی ئیسلام بەم  شەڕە (استغلال)کردنێکی قێزەونی دینە بۆ سیاسەتێکی نەتەوەیی  و گەرمکردنی ڕای گشتی ‌و پاساودانی جەنگەکەو پشتیوانی لە ھەڵمەتەکە. بۆیە دەبێت ئەو جۆرە بەکارھێنانەی دین بە خراپە ‌و زوڵمکردن بەرامبەر خودی ئیسلام‌و بەھاکانی بزانین. بە بوێریەوە ئیدانەی بکەین ‌ولەڕوی ھەڵماڵین،. ئەگەر دڵسۆزی ئیسلام‌و گەلەکەمان بین، لێسەندنەوەی رەوایەتی لەم جۆرە بەکارھێنانەی دین، ئەرکێکی ئیسلامی نیشتمانی ‌و ئەخلاقیە. زۆریش سەیرە تورکیا سورەتی فەتح بۆ شەڕکردن دژ بەکورد بخوێنێ  لەکاتێکدائەندامی ھاو پەیمانی ناتۆو ھاوپەیمانی ڕوسەکان  بێت وباڵوێزخانەی ئیسرائیلش لەئەنقەرەبێت؟!.
٨.    راستە سەرۆکی تورکیا ‌و سوپاکەی دژ بە کورد نین وەک کورد، بەڵام گومانی تێدانیە دژ بە بوونی کێشەی کوردن، دژی کوردێکن ، ھەر بیروباوەڕێکی ھەبێت، کە لەسەر بناغەی کوردبوون، کە سەدساڵە بەھۆی ئەو ناسنامەوە دەچەوسێتەوە ، وەک تورک‌و میللەتانی تری موسڵمان داوای مافە نەتەوەییەکانی  خۆی بکات . 
 ھەر لەم چوارچێوەدا، پەکەکە بەرھەمی چەوساندنەوەو بوونی کێشەی کوردە، نەک کێشەی کورد بەرھەمی پەکەکە بێت، توندڕەوی فیکری ‌و فیزیکی  پەکەکەش لە ھەندێ کات‌و شوێندا لەڕوێکی گرنگیدا، کاردانەوە بووە بەرامبەر توندڕەوی کەمالیزم‌و قوڵایی ئەو چەوسانەوەی کورد لە مێژووی تورکیادا دووچاری ھاتووە ‌وتاکو ئێستاش دەوڵەت ئامادە نیە چارەسەری بکات. خۆزکە دەوڵەتی تورکیا تەنھا دژی پەکەکە بوایە ‌و دژی مەسەلەی کورد‌و مافە نەتەوەییەکانی کورد نەبوایەو ئامادە بوایە لە دەرەوەی پەکەکە وە چارەسەری کێشە کە بکات.
٩.     ئەگەر مەسەلە کەعەقیدە ‌  بێت، رەنگە کەم ھێز‌و دەوڵەت  بەئەندازەی بەعسی سوری عەلمانی و نادیمکرات و نەتەوە پەرست و خوێنڕێژ بووبێت ،مەگەر ھاوتا بەعسیەکەی لەعێراقدا، ھەموومان دەزانین ھەر لە وێرانکردنی (حەما) لە ساڵی (١٩٨٢)ەوە تاکو ئێستا ئەم رژێمە چی بە موسڵمانان ‌و ئیسلامییەکانی ئەو وڵاتە  وگەلی سوریاکردووە. کەچی تورکیا  لای ئاساییە ناوچە کوردییەکان بخرێنەوە ژێر دەسەڵاتی ئەو،چونکە  لەدیدی ئەوەوەگرنگ ئەوەیە بەدەست ھێزە کوردییەکانەوە نەمێنێ وکۆتایی بە بوونی قەوارە کوردییەکەی ئەو بەشە  بێنێت.!ئامادەیە رووسە ئەرسەدۆکسەکان  ناوچەکە کۆنترۆڵ بکەن‌و لە دەست کوردی دەربێنن.ھەربۆیە  ئەم پرسە  لە دوور ‌و نزیکەوە بەپەیوەندی  بە(ئیسلام) و (عەقیدە)وە نیە. سەبارەت  بە بیرکردنەوەی موسوڵمان وئیسلامخوازێکی کورد یش لە چۆنیەتی ھەڵوێست گرتن بەرامبەر پرسە نە تەوەییەکان و  لەوانەش ئەم پرسەی ئێستای ڕۆژئاوا، پێمان وایە دەبێت بیرکدنەوەو داوەریکردنی  ل چوارچێوەی ئەم خاڵانەی  خوارەوەدا بێت:
١.    دەبێت ئیسلام   وئیلھام وەرگرتن لێی ودیدی ئیسلامی ، کێشەی ھەست بە کەمی مرۆڤی کورد لە بەرامبەر نەتەوە و بزوتنەوە نەتەوەیەتیەکانی  تر چارەسەر بکات‌و جۆرێ لە غروری ئەخلاقی‌و متمانە بەخۆبوون‌و گیانی یەکسانی  لەگەڵ  ئەوانی دی پێ ببە خشێت وبۆبگێڕێتەوە کەبەداخەوە لەڕابردوودا ناسیونالیزی کوردی لەم ڕوەوە زۆر سەرکەوتوو نە بووەو کێشەی جددی ھەیە .بەحوکمی ئەوڕوحە عەدالەتخوازەی ئیسلام ھەڵگریەتی.ئەو ڕۆحەی شێخی نەھری و شێخ عە بدوسسەلامی بارزانی وشێخ سەعیدی پیران  وشێخ مەحمودوقا زی محەمەد وکۆمەڵەی ژ ک وچەندین تێکۆشەری تر ھەڵگری بوون.وەھەر بیرکردنەوەو ڕوحیەتێکی تر وەلاوە بنێین پێچەوانەی ئەمە بێت.
٢.    بەبوێریەوەلەڕووی ھەموو ئەو ھەوڵانە ھەڵماڵێ کە بەشێوەیەکی نائەخلاقی ھەوڵی خراپ سودلێوەرگرتنی ئاین وھەستی ئاینی دژ بەگەلەکەمان دەدەن و وێناکردنیان وەک ڕێزنەگرتن لە خودی ئیسلام وبەکارھێنانی وەک ئامرازێک بۆئامانجی نائیسلامی وزاڵمانە.
٣.  بنەمای یەکسانی گەل ونەتەوەکان  دادپەروەری لەڕوانگەی  ئیسلامەوە، رێگامان پێدەدات ،لە سەردەمی دابەشکردنی جیھان لەسەر بناغەی نەتەوەیی، ئێمەش لە بەرژەوەندییە نەتەوەییەکانمان تێبگەین ‌و ھەوڵی بەدیھێنان پاراستنیان بدەین ‌،ئەمەش بە خاڵێکی ھاوبەشی نێوان ھەموو ھێزە کوردی وکوردستانیەکان بزانین، بە جیاوازی ئینتیمایانەوە. 
٤. ئاساییە ئیسلامخوازو ئیسلامیەکان دیدگاو زمانی تایبەت بە خۆیان  لەکاتی ڕەتکردنەوەی دەستدرێژی بۆسەر میللەتەکەیان ھەبێت  ، لەوێنەی جەختکردنەوە لەوەی ئەم جۆرە جەنگ وپەلامارانانەو   درێژەکێشانی مەسەلەی کورد‌و  چارەسەر نەکردنی، دژ بە  سەرەتای برایەتی گەلانی ناوچەکەیە ‌و بوغز‌و رقی نەتەوەیی پەرە پێدەدات وڕێگا بۆ دەستێوەردانی دەرەکی دەکاتەوە.  ھەروەھا ڕێ لەوە دەگرێت نەتەوە موسڵمانەکان  یەکێتی یەکی ھاوشێوەی یەکێتی ئەوروپا دروست بکەن.واتە یەکیەتیەک واتای ھاوکاری نێوان نەتەوە سەربەخۆکان بە دەستەوە بدات.
٥. جیاکردنەوەی مەسەلەی کورد لە فیکرو ئینتیمای فیکری وسیاسی ھێزە کوردییەکان.بەحوکمی ئە وەی مەسەلەکەخۆی لەخۆیدا وبەدەر لەوانەی نوێنەرایەتی دەکەن، ڕەواو عادیلانەیە.