سەردێڕ:

کابینەکەی عەبدولمەھدی لە بەردەم ئالنگارییەکاندا

9/17/2019 3:01:24 PM
3178 جار خوێندراوەتەوە
بورهان شێخ ڕەئووف
+ -

ئەگەرچی کابینەکەی  د. عادل عەبدولمەھدی ھێشتا ساڵی یەکەمی تەمەنی حوکمڕانی  تەواو نەکردووە،  ئومێد و ئاواتێکی گەورەی لە سەر ھەڵچنرابوو، لە کاتێکدا ھەموومان ئاگاداری بارودۆخی عێراقین چ وێرانەیەک بوو لە دوای شەڕی تیرۆر و داعش و ململانێ ناوخۆیی ھەمەچەشنەکانی ھەرلە ناکۆکی نێوان ھەرێمی کوردستان و حکومەتی ناوەندی،  ناکۆکی سوونە و شیعە، ناکۆکی شیعە و شیعە ...هتد.

عەبدولمەھدی بێ پشت و پەنا ترین کەس لە ئەنجوومەنی نوێنەرانی عێراق  و تەنانەت بەشداری  دوا ھەڵبژاردنەکانی  عێراقیشی نەکرد ئەگەرچی لە دوای گۆڕانکارییەکانی ٢٠٠٣ ەوە  فیگەرێکی دیاری سەر گۆڕپانی سیاسی وڵات بوو ھەر لە جێگری سەرۆک کۆمارەوە تاوەکو وەزیری دارایی و دواتر وەزیری نەوت کە دەستی لە کارکێشایەوە پێش تەواو بوونی چوار ساڵەکەی، پێویستە ئاماژە بەوەش بکەم کە لە سەردەمی ئۆپۆزەسیۆنیشدا یەکێک لە سەرکردەکانی ئەنجوومەنی باڵای شۆڕشی ئیسلامی لە عێراق بوو، بەڵام بێ ئومێدبوونی لە بارودۆخی عێراق دوورەپەرێز وەستا بوو، تاوەکو دواجار وەکو کاندیدی سازان و چارەسەری ناوەنجی و وەکو پەتی نەجات بۆ دەرباز کردنی عێراق لە قەیرانەکان پەنای بۆ برا .

دیارە ئەرکی عەبدولمەھدی و کابینەکەی  ئێجگار قورسە لە بەر ئەو فاکتەرانەی کە لەسەرەوە ئاماژەم پێدان بۆیە ئەو بارودۆخ و ژینگە سیاسیە لە ھەمووان دەخوازێت کە پشتیوانی بکەن چ لە ناوخۆ بە تایبەتی کورد و دواتر سوونەکانیش چونکە ئەم کەسایەتیەکی میانڕەو و نیشتمانییە و تاڕادەیەکی باشیش دوورە لە مەیلی تائیفەگەرییەوە،  لە نێو ماڵی شیعەیشدا خاڵی ھاوبەشی نێوان لایەن جیاوازەکانیانە، لە ڕووی دەرەوەیش بۆ ئەمریکا و ئێران کە ئێستا لە ململانێ یەکی سەختدان،  عەبدولمەھدی تا ئێستا توانیوویەتی بگونجێت و بۆ لەمەودواش ئەگەر لێ ی بگەڕێن دەخوازێت عێراق دوور بگرێت و نەبێتە بەشێک لەو ململانێ مێژوویی و ئاڵۆزە  لە کاتێکدا لە گەڵ سەرۆک کۆمار ( د. بەرھەم ساڵەح ) پەیوەندییەکی زۆرباشیان ھەیە  تا ئاستێکی نایاب سازاون .

ئالنگارییەکانی بەردەمی :

١.      ناوخۆیی: زۆر میلیشیا و تاقمی چەکدار ھەن کە پێگە و پارەیان ھەیە لە ھەوڵی ئەوەدان ئارامی و  ئاسایشی وڵات بشێوێنن و لەماوەی ڕابردوو حکومەتەکەی بڕیاری ھەڵوەشاندنەوەی حەشدی شەعبی دا وکە ڕێکیان بخاتەوە لە ناو سوپای عێراقدا بەڵام پێناچێت بە ئاسانی جێبەجێ بکرێت .

٢.      ھەڕەشەکانی دەرەوە: لە ماوەی ڕابردوودا لێدان و بۆمب بارانکردنی بنکە و بارەگاکانی حەشدی شەعبی کە دەنگۆی ئەوە ھەیە لە  لایەن ئیسرائیلەوە ئەنجام درابێت لە ئامرلی و قائیم و  پارێزگای سەلاحەدین و لە دەوروبەری بەغداد کە ئەمەش وایکرد خاکی عێراق ببێتە گۆڕەپانی ململانێکانی وڵاتانی تر  ئەمەش دژ بە خواستی حکومەت و گەلی عێراقە و لە کاتێکیشدا دەنگۆی ئەوەش ھەیە کە دەستی ناوخۆیی بن .

٣.      دۆسێ ی گەندەڵی: یەکێک لە پەتاو نەخۆشی یە قورس و شێرپەنجەییەکانە کە جەستەی عێراقی گرتۆتەوە لە دوای ساڵی ٢٠٠٣ ەوە گەندەڵی یە بە ھەموو جۆرەکانیەوە لە ئاستە ھەرە باڵاکانی حکومەتەوە تا خوارەوە تەشەنەی کردووە کە مەترسییەکەی لە تیرۆر زیاترو سامناکترە , ھەرچەندە عەبدولمەھدی ئەنجوومەنی باڵای بەگژاچوونەوەی گەندەڵی دامەزراندووە، بەڵام تا ئێستا ئاکامێکی بەرچاوی نی یە . ژینگەی عێراقیش یارمەتیدەرە بۆ گەشەکردن و پەلھاویشتنی زیاتری گەندەڵی دارایی بە فێڕۆدانی سامان و داھاتەکەی لە بەرئەوەی بە شێوەیەکی ڕەھا پشت بە نەوت و وزەی سروشتی دەبەستێت و حزب و لایەن و تاقمە دەستڕۆیشتووەکان لە ھەوڵی ئەوەدان زیاتر دەستی بەسەردا بگرن و ھاوپەیمانی تەنانەت سیاسیش بکەن و ھاوبەش بن و تەنانەت چاو  لە یەکتری بپۆشن،  بە یاسا ئەنجوومەنی نوێنەران بە تایبەتی لە خوولەکانی پێشووتر ئیمتیازات و مووچەو دەستکەوتی چەوربۆ خۆیان ببڕنەوە .

٤.      لە ڕوی کۆمەڵایەتی یەوە: یەکێکی دی لەو بەربەست و کێشانە ڕووبەڕووی عەبدولمەھدی بۆتەوە کێشەی خێڵەکان  بە تایبەتی لە پارێزگای بەسرە، کێشەی ئاوارەکان و مووسڵ و کەرکوک ....هتد.

لە ئاوا بارودۆخێکدا بێگومان ئەرکی عەبدولمەھدی ئاسان نییە لە کاتێکدا ھێزو لایەنە سیاسیەکانی عێراق  لە ژێرکاریگەری ھێزە باڵا دەستەکانی جیھان وناوچەکەدان بە تایبەتی ئێران و ئەمریکا کە ھەندێکیان ڕوو لە ئەمریکاو ھەندێکیان ڕوو لە کۆماری ئیسلامی و ھەندێکیشیان کە لە ھەردوو ئەو بەرە ڕۆڵیان مەترسیدارترە ئەو تاقمە بەرژەوندی خواز و دیماگۆگیەن کە لە گەڵ ئەمریکیەکان ئەمریکین و لە تەک ئێرانییەکان ئێرانیین کە ئەمانە لەھەوڵی ئەوەدان لە ھەردوو لای ھاوکێشەکە سوودمەندبن .

لە کۆتاییدا عەبولمەھدی لەھەوڵی بنیاتنانەوەی عێراقدایە و ھەوڵیشی بۆ داوە بەڵام کاتی دەوێت ئەگەر لایەنە سیاسیەکان پشتگیری بکەن ئەو دەخوازێت عێراق لە ڕووی کشتوکاڵییەوە زیندوو بکاتەوەو پشت بە داھات و بەروبوومی ناوخۆیی ببەستێت بۆ نموونە، لە ڕووی پەیوەندی دەرەوەش ھەوڵی داوە بۆ ئەوەی پەیوەندییەکانی عێراق لە گەڵ دەورو بەرە عەرەبییەکەی  وڵاتانی تریش ئاسایی بکاتەوە .