سەرنووچە:

دەمێ سەرھلدانەکا کوردی کوردی یە!

PM:02:12:15/03/2022
3192 جار خوێندراوەتەوە
ئەحمەد عەبدولا
+ -

ئەو ئاخفتنە نە ڕاستن ئەوێن دبێژن سەرھلدانا ١٩٩١ دژینگەھەكا ساخلەم دا ژ دایك بوو!
ئەگەر ئەم هویرتر بەرێ خۆ بدەینێ دێ بینین ئاریشا مە نە دپروسێسا سەرھلدانێ دایە ژبەرکو سەرھلدان دەلیڤەیەک بوو ژ ئالیێ ھێزێن بیانی ڤە بۆ کوردێن باشور سەقایەک ھات رەخساندن لەوما شیان دەلیڤێ ژ وی سەقای وەربگرن و زێدەباری وێ لسەر بنیاتێ خەباتا پێشمەرگەی سەرھلدانێ تێدا ئەنجامبدەن.

ئەو دەنگ ڤەدانا ژ کۆجا ملیۆنی یا کوردێن باشور چێبووی پەقینەک بوو، ڕایا زلھێزێن جیھانێ ڕاکێشا ناڤ کوردان و دئەنجام دا قەوارەیەکێ کوردی ژێ چێ بوو، بەلی بمخابنیڤە ئەڤ کۆجە وەکو کوڕێ ژنبابێ تێدهێتە دیتن و سەرھلدان بۆ ھەر تشتەک، بەلێ حەتا ئەڤرۆ ژی ئارمانجێن سەرھلدانێ دلێ سەرھلدانیان خۆشنەکرینە.

بەلێ ئاریشەیا کوردێن باشور یاراستەقینە قۆناغا پشتی سەرھلدانێ دەستپێکر، دەمێ ڤان ھەر دوو بنەمالان بھەما عەقلیەتا چیایی حوکم لباژێران کری و ئەو ھەڤرێکیێن دگەل ئێک ھەین لسەردەمێ خەباتا چەکداری راکێشان بۆ ناڤ سازیێن سڤیل، هەروەسا دەست بسەر ملک و مالێ ھەرێمێ دا گرت و ئێدی ھەمی تشت بۆ زەنگینکرنا خۆ بکارئینان و خۆ بتاکە خۆدانێ ڤی عەردی زانین.

ھەر وەسا ئەنجامێ سەرھلدانا دژی رژێما بەعس دەلیڤەكا باش پەیداکر بۆ دوو بنەمالێن بێ ئەزموون درێڤەبرنا چڤاكێ سڤیل و سازیێن میریدا، لەوما مە دیت پیسترین ئەزموونا حوکمرانیێ و نەسەرکەفتی و عەیبدار پێشکێشکرن.

ئەرێ تو دزانی ژبەرچی دەستھەلاتا كوردی حسابێ بۆ برسیكرنا خەلكێ ناكەت؟ ژبەرکو حەتا نوكە ئێك حوكمێ كوردا بدەستێ كوردا نەھاتی یە ژناڤبرن واتە سەربوورەكا ھوسا دناڤ بەرپەرێن مێژوویا مللەتێ كورد دا نائێت دیتن، حەتا كو ئەڤ دەستھەلاتە ژ تۆڕەی و برسیکرنا خەلكێ بترسیت، لەوما هەر تشتێ دڤێت دکەت.

بباوەرا من ئێخستنا كورسیكا دەستھەلاتێ وەكی ترسا شکاندنا دیوارێ ئینانا ھەڤژینا دووێ یە، دبێژن ئەگەر مرۆڤی ئەو وێرەكی ھەبیت ھەڤژینا دووێ بینیت یا سێ و چارێ گەلەک بساناھی یە ئەڤجا ھەكە خەلکێ ئەو وێرەكی ھەبیت ڤێ دەستھەلاتێ بێخین ئەو حوكمدارێن پشتی ڤان تێن سەر كورسیکا دەستھەلاتێ دێ حسابەكێ بۆ مللەتی كەن ژبەرکو لادانا وان دێ یا بساناھیتر بیت ژ ئەڤەێن نوکە لسەر کورسیکێ.

بێگومان ئەڤان ھەردوو بنەمالان ژ لاێ خەلکێ ڤە حەتا ڤێ خۆلەکێ فشارەكا جددی بەرامبەر خو نەدیتی یە، واتە دەستھەلاتدارێن كورد ھێزا گەلی لهەمبەر خۆ نەدیتە ھەر باوەری ژی بڤێ ھێزێ نینە ژبەرکو ئەز و تۆ ھەست پێ دکەین ئەگەر ئەڤ ڕەوشە ھوسا بەردەوامبیت ئەگەرێ پەقینێ دهێتە پێشبینیکرن، ئەرێ ما یا بەرئاقلە ئەو ھەست پێ نەکەن؟.

ئەو باسکێ نەرازی ژ ڤێ ڕەوشێ و مەرەقدارێ گوھورینا ڤێ دەستھەلاتێ یە ترسا نەبوونا ئەلترناتیفی ئانكو بەدیلەكێ دی یاھەی و دبێژن دەمێ ئەڤ حوكمە نەمینیت دترسن بوشاھیا ئێمناھیێ و بەرەلای و (تخریب) پەیدابیت جنکو کەس نینە جھێ وان بگریت.

ئەڤ جەندە ژی ھەر ب بەرنامە یاھاتی دورستكرن ڤان ھەردوو بنەمالا گەلەک یال سەر ھندێ کارکری دەرفەتێ نەدن ئەلترناتیفەک بوان چێبیت دا خەلک بێ ھیڤی ببن ژ گوهۆرینان.

بەلێ حەتا شەف باش تارینەبیت سپێدەھیەکا زەلال نائێت واتە حەتا قوربانی بو دەربازبوون ژ ڤی ڕەوشا قرێژی نەدەین ئەم نەشێن رەوشەکا باشتر پەیدابکەین.

پشتی شەڕێ ئوكرانیا سادەترین تاكێ كورد پتر ھەست بمەترسیێ دكەت لسەر ھەرێمێ ژ لاێ دەولەتێن دەوروبەرڤە بەلێ وەكو دیار حوكمدارێن ڤی مللەتی ھەر بەردەوامن لسەر دفن بلندی و خو پەرێسی و بازرگانیكرن و گەندەلیا خۆ ھەر وەكی مێشەکێ نەدادای سەر دفنا وان.. نە ئامادەنە چاکسازیێ بکە و نە رێکێ ددەن کەس جھێ وان بگریت.

گەلەری