سەرنووچە:

بتنێ بێژنە گەندەلان گەندەل گوهەرین دێ دروست بن

PM:07:32:21/12/2021
43588 جار خوێندراوەتەوە
میر نێروەی
+ -

گەندەلی وەکی نەخۆشیەکا کوژەکا ئابوری و ئیداری و سیاسی دهێت دیتن، وەکی دیار هەرێما کوردستانێ ژی ژ دەستپێکێ هەیا نها تێکەلی ڤێ گەندەلیێ بوویە و ل دەستپێکێ گەندەلی دهاتە پەردەپۆشکرن و ب نەپەنی بوو و دەستهەلاتا سیاسی حاشاتی ل هەبوونا وێ دکر، لێ پشتی سالا ٢٠٠٩ێ حکومەتا هەرێمێ و سەرۆکاتیا هەرێمێ دانپێدان ب هەبوونا وێ کر، داوی جار ژی د کابینا نەهێ یا حکومەتا هەرێما کوردستانێ دا بانگەوازیا چاکسازیێ کر، هەر چەندە هەیا نها بتنێ ناڤ ژی بوویە، لێ ئەڤ پێنگاڤا چاکسازیێ دەلالەتێ لسەر هندێ دکەت کو هەرێم ب ئابوور و ئیدارە و سیاسەتا خۆ ڤە توشی نەخۆشیا کوژەکا گەندەلیێ بوویە.

لڤێرە دخوازم بێژم، ل هەرێما کوردستانێ کەرتێ گشتی و تایبەتی ب تەمامی توشی گەندەلیێ بووینە، هەڤدەم گەندەلی ب ئاشکرایێ و لبەر تاڤا رۆژێ دهێتەکرن و زۆر ب ئاشکرایی و بێمنەتانە، کەسێن گەندەل د دیارن، ئەگەر تو تەماشەی گوندێ خۆ، عەشیرا خۆ و باژێرێ خۆ و جهێ کارێ خۆ بکەی هەر د یەک ژ وان دا دێ چەند گەندەلان بینی، هەڤدەم د جڤاکێ مە دا ئاڤاکرنا گەندەلان ژی هەیە دگەل دیتنا وان گەندەلان دا لشوونا ب کەسێن بێ ویژدان و دز و ئاست نزم بهێنە لقەلەمدان، رێزەکا مەزنتر لێ دگرن و خۆ بۆ دشکێنن و سەرێن دیوانا بۆ وان چوول دکەن و گوتنێن ئەزبەنی و ئەز خۆلام و سیدا ب وان دهێنە گوتن، ئەڤە ژی دەلالەتێ هندێ یە کو تاکێن جڤاکێ مە هەڕ یەک د ئاستێ خۆ دا ب ئاوایەکێ جوودا توشی گەندەلیێ بووینە، و کەس خۆ ژ وێ گەندەلیێ دوور ناگریت، ئەو رێژا خۆ ژێ دوور ژی دکەت بەرزەبووینە و دەلیڤە ب وان ناهێتە دان.

هەڤدەم، د نها دا چاڤ و زمانێ پتریا جڤاکی لسەر گوهەرینێ یە کو گوهەرتنەک دروست بیت و ئەڤ بێ دادی یە بهێتە چارەسەرکرن، لڤێرە من دڤێت بێژم ئێکەم پێنگاڤا هەری بساناهی یا گوهەرینێ د ڤێ قوناغێ دا، بتنێ ئەوە تو بێژیە گەندەلی گەندەل، و نەبێژیێ بەرێز و سەیدا، هەر دەما ئەڤ پێنگاڤە هاتە هاڤێتن، دەرگەهێ هەمی گوهەرینێن دی دێ ڤەبیت، هوسا قوناغ ب قوناغ ب هوشیاریا تاکێن جڤاکی دێ رەوشا مە بەرەڤ چارەسەریێ چیت.

گەلەری