AM:10:36:07/07/2022
1132 جار خوێندراوەتەوە
+
-
د بازارێن جیهانێ دا، بهایێ یۆرۆ ب ئاوایەکێ
بەرچاڤ داکەتن بخۆڤە دیتیە و ١٠٠ یۆرۆ بەرامبەر ١٠٢ دۆلارێن ئەمریکی یە و بڤێ ژی
بهایێ یۆرۆ نێزیکبوویە ل دۆلارێ ئەمریکی و پێشبنیا داکەتنا زێدەتر ژی دهێتەکرن.
شارەزایێن ئابووری بەحسا وێیەکێ دکەن، سەدەمێ
داکەتنا بهایێ یۆرۆ ڤەدگەریت بۆ وی یەکێ کو بەنکێن ئەمریکا رێژا مفای زێدەکریە و
بەنکێن ئەورۆپا ئەو کارە نەکریە، وێ ژی وەکریە خواست لسەر کارکرنا دۆلاری زێدەتر
ببیت.
ژ ئالیەکێ دی ڤە، بەحسا وێیەکێ ژیکریە، شەڕێ
روسیا و ئۆکرانیا ب ئاوایەکێ ڕاستەوخۆ کارتێکرن لسەر ئەورۆپا دبیت و ئەو ژی
سەدەمەکێ دی یێ داکەتنا دراڤێ یۆرۆیە ل هەمبەر دۆلارێ ئەمریکی.
ئەو ژی د دەمەکێ دایە، بهایێ یۆرۆ بەرامبەر دۆلارێ
ئەمریکی کێمترین ئاستێ خۆ د هەیاما ٢٠ سالێن دەربازبووی دا تۆمارکریە و د بازارێن
ئەورۆپا دا ١٠٠ یۆرۆ ب ١٠٢ دۆلاران بازار پێ دهێتەکرن و بڤێ ژی هەڤبەر ب ١٥٠ هزار
دینارێن عێراقی یە.
مێژوویا دراڤێ یۆرۆ:
یۆرۆ ئەو دراڤەیە ژ دەستپێکا سالێن نوتا
بیرۆکەیا دروستبوونێ هاتە هەبوونێ ژ ئالیێ وەلاتێن ئەورۆپا ڤە بۆ بازارکرنێ ب
دراڤەکێ هەڤبەش د ناڤ وەلاتێن ئەندامدا کو هەڤرکیا دۆلارێ ئەمریکی بکەت.
ل سالا ١٩٩٩ێ بازارکرن ب دراڤی ب ئاوایێ دراڤێ
کاغەزی نەبوو، بتنێ ب ئاوایێ دراڤێ ئاسنی بازار پێ دهاتەکرن.
مێژوویا ئێکەم بازارکرن ب یۆرۆی ل ١ی مەها
کانونا دووێ ٢٠٠٢ێ بوو کو ١٢ وەلاتان پشتەڤانی لێکر و کار پێ کرن.
هەڤدەم، د هەیاما ڤان ٢٠ سالان دا ژبلی وان
١٢ وەلاتان حەفت وەلاتێن دی یۆرۆ بکاردئینن کو پێکدهێن ژ قۆبرس، ئیستۆنیا، لاتڤیا،
لیتوانیا، سلۆڤینیا، سلۆڤاکیا و مالتا و پێشبینی ژی دهێتەکرن بولگاریا، کرواتیا و
رۆمانیا، کو ئەندامێن یەکێتیا ئەورۆپانە ل سالێن داهاتی بچنە دگەل وان وەلاتێن دی
یێن یۆرۆی بکار دئینن.
د نها دا، ژ ئالیێ ٣٤٠ ملیۆن کەسان کار ب
یۆرۆی دهێتەکرن.