PM:08:45:04/07/2022
3752 جار خوێندراوەتەوە
+
-
وەزارەتا پەتڕۆلا عێراقێ ڕاگەهاند، کۆمپانیێن
جیهانی یێن مەزن وەکی شلەمبێرگ و هالیبێرتۆن بیگەر هیوز وەزارەتا پەتڕۆلێ
هایدارکرینە وەکی پێگربوونا وان ب بڕیارا دادگەها فیدڕالی چ پرۆژەیێن نووی ل
هەرێمێ دەست پێ ناکەن. دبێژیت ژی، "د نها دا مژیلی تەمامکرنا کارێن خۆ و
پاقژکرنا داوی هەژماریێن خۆ و داخستنا گرێبەست و مامەلەیێن خۆنە دگەل
هەرێمێ".
ئەڤرۆ دووشەمبی، وەزارەتا پەتڕۆلا عێراقێ
ڕاگەهاندنەک بەلاڤکریە و تێدا هاتیە، ب لبەرچاڤگرتنا وان پرسیارێن ئاراستەی وەزارەتا
پەتڕۆلێ دهێنەکرن دەربارەی کارێ کۆمپانیێن مەزنیێن جیهانی یێن بەرهەمئینانا
پەتڕۆلێ ل هەرێمێ، پێگربوونا خۆ ب بڕیارا دادگەها فیدڕالی ڕاگەهاندینە.
ئاماژە ب وێیەکێ ژیکر، هەمی وان ئالی و
رۆژنامە و میدیایێن جیهانی پشتڕاست دکەین کو کۆمپانیا شلەمبێرگ و هالیبێرتۆن بیگەر
هیوز د نها دا مژیلی پاقژکرنا بەشێ ژمێریای و داخستنا سەکۆیێن خۆ و داویئینان ب
گرێبەستێن خۆ ل هەرێمێ نە.
دبێژیت ژی، وان کۆمپانیان وەزارەتا پەتڕۆلێ
هایدارکریە وەکی پێگربوون ب بڕیارا دادگەها فیدڕالی چ پرۆژەیەکێ نووی ل هەرێمێ
دەست پێ ناکەن.
ل داویا ڕاگەهاندنێ ژی وەزارەتا پەتڕۆلێ
گوتیە، ل گۆرەی ڤێ سۆزنامێ وان کۆمپانیان ل هەرێمێ ب ئاوایێ قەوارەیەکا بازرگانی
یان هەر کۆمپانیەکا دی ڤێجا ب مارکەیا بازرگانی بیت یان ب ئاوایەکێ جۆدا یان ب
نوینەراتیا وان بیت، ب چ ئاوایەکێ ل هەرێمێ کار ناکەن کو بەروڤاژی بڕیارا دادگەها
فیدڕالی بیت یان بەروڤاژی رێنمایێن وەزارەتا پەتڕۆلێ بیت.
ئەڤە د دەمەکێ دایە، هەر ئەڤرۆ ژێدەرەکێ
بەژدار د روونشتنا دادگەها کەرخ دا بۆ دەنگێ ئەمریکا ڕاگەهاند، دادگەهێ بڕیارەک
دەربارەی گرێبەستێن هەر ئێکە ژ کۆمپانیێن "DNO, Genel Energy, WZ, HKN"
دەرخست کو مژیلی بەرهەمئینانا پەتڕۆلێ نە ل هەرێمێ.