PM:04:02:03/07/2022
772 جار خوێندراوەتەوە
+
-
ژبەر بدەستڤە ئینانا ژمارەیا پیڤانەیا هاوردەکرن و زۆربوونا داهات و
هاتنا جەژنا قوربانێ، وەزیرێ پەتڕۆلا عێراقێ بڕیارا مەزاختنا ١٠٠ هزار دیناران وەکی
جەژنانە بۆ کارمەندێن کەرتێ پەتڕۆلێ دا.
ئیحسان عەبدولجەبار وەزیرێ پەتڕۆلا عێراقێ و رێڤەبەرێ کۆمپانیا پەتڕۆلا
نشیمانیا عێراقێ بڕیارا مەزاختنا کۆژمێ ١٠٠ هزار دیناران بۆ وان کەسان دەرخست یێن
کو د بیاڤێ پەتڕۆلێ دا کار دکەن ب میلاک و گرێبەست و وان کەسان ژی یێن ب ئاوایێ رۆژانە
پارەی وەردگرن.
ئەڤە ژی د دەمەکێ دایە، رۆژا ئەینی سەرژمێریاری بۆ بڕ و هەناردەیا پەتڕۆلا
خاڤ هاتیە کرن و دەستکەفتێن وان بۆ مەها حوزەیرانا دەربازبووی ب بلنترین دەسکەفتێن
مەهانە د دیرۆکا عێراقێ دا هاتینە هەژمارتن.
وەزیرێ پەتڕۆلێ د ڕاگەهاندنێ دا ئاماژە ب وێیەکێ کریە، ئاستێ هەناردەیا
پەتڕۆلێ گەهشتیە ١٠١ ملیۆن و ١٩١ هزار و ١٣٦ بەرمیلان و بڕێ پارەی ژی زێدەتر بوویە
ژ ١١ هزار و ٥٠٥ ملیار دۆلاران.
ئەڤە ژی د دەمەکێ دایە، رۆژا سێشەمبی ٢٨ حوزەیرانێ، سالار عەبدولستار
وەزیرێ کار و کاروبارێن جڤاکیێ عێراقێ ب وەکالەت ڕاگەهاند، مووچەیێ کرێکارێن خانەنشینکری
ب ١٠٠ هزار دینارێن جەژنانە ڤە دهێتە پارڤەکرن ژبەر هاتنا جەژنا قوربانێ.
پێدانا جەژنانەیێ ژ ئالیێ حکومەتا عێراقێ ڤە د دەمەکێ دایە، بهایێ پەتڕۆلێ
د بازارێن جیهانێ دا د ئاستەکێ بلند دایە و ڕەوشا دارایی یا وان وەلاتێن پەتڕۆلێ
دفرۆشن باشتر بوویە، لێ ل هەرێما کوردستانێ زێدەباری زۆریا داهات و فرۆتنا پەتڕۆلێ
پارڤەکرنا مووچەی د دەمێ خۆ دا پاشدکەڤیت، د دەمەکێ دا بەریا نها حکومەتێ سوز
دابوو ٢٥ی هەمی مەهان مووچەیی پارڤەبکەت.