AM:09:45:19/05/2022
652 جار خوێندراوەتەوە
+
-
ئەمریکا جارەکادی بالیۆزخانەیا خۆ ل کیێڤا پایتەختێ ئۆکرانیا ڤەکرەڤە پشتی بۆ دەمێ سێ مەهان بسەدەمێ شەڕێ دناڤبەرا وی وەلاتی و روسیا داخستی.
ئەڤرۆ پێنجشەمبی، ئەنتۆنی بلنکن وەزیرێ دەرڤە یێ ئەمریکا ڕاگەهاندنەک بەلاڤکر و تێدا هاتیە، گەلێ ئۆکرانیا ب هەڤکاریا کۆمەلگەها ناڤدەولەتی بەرەڤانی ژ ئاخا خۆ کر لهەمبەر هێرشێن روسیا.
ئاماژە ب وێ یەکێ کر، ژ ئەنجامێ وێ بەرەڤانی کرنێ جارەکادی ئالایێ ئەمریکا ل ئۆکرانیا دێ هلدەنە ڤە.
د پشکەکا دیا ڕاگەهاندنێدا هاتیە، "ب هەمی شانازیانڤە مل ب ملێ ئۆکرانیا د راوەستین و دێ بەردەوامبین ژ پشتەڤانیکرنێ ددەنەکیدا وان بەرەڤانی ژ وەلاتێ خۆ دکەن لهەمبەر وی شەڕێ دژوارێ دوژمنکارنە یێ کرملن دەستپێکری".
ئەڤە ددەمەکیدایە، درەنگیا شەڤا چارشەمبی، جڤاتا پیرێن ئەمریکا ب کۆما دەنگان بریدجت برینکی وەک بالیۆزێ نویێ وەلاتێ خۆ ل ئۆکرانیا دەستنیشانکر.
ژ سالا ٢٠١٩ێ وەرە، پشتی دۆنالد ترامپ سەرۆکێ بەرێ یێ ئەمریکا ماری یۆڤانۆفیچ، بالیۆزێ وەلاتێ خۆ ژ ئۆکرانیا لسەر کاری لادای، ئەمریکا بالیۆز ل وی وەلاتی نەمابوو.
هەروەسا، پشتی دەستپێکرنا ئۆپراسیۆنێن سەربازیێن روسیا ل رۆژهەلاتێ ئۆکرانیا و بۆمبەبارانکرنا باژێرێن مەزن ب رێیا بالەفڕێن شەڕکەر لسەر هەمیێ ژی کیێڤا پایتەخت، ل ١٤ی شوباتا ٢٠٢٢ێ ئەمریکا بالیۆزێ خۆ بۆ باژێرێ لفیف ل رۆژئاڤایێ ئۆکرانیا ڤەگوهاست.