PM:08:24:25/01/2022
980 جار خوێندراوەتەوە
+
-
هێزێن سوریا دیموکرات ڕاگەهاند، ب وان ٢٥٠
چەکدارێن داعش ڤە کو ئەڤرۆ خۆ ڕادەستی هەسەدێ کرینە، ژمارەیا وان چەکدارێن خۆ
ڕادەستکرینە؛ د دەمێ پێنج رۆژێن دەربازبووی دا گەهشتیە ٥٥٠ی چەکداران.
ناڤەندا ڕاگەهاندنا هێزێن سوریا دیموکرات د
ڕاگەهاندنەکێ دا بەحسا وێیەکێ کریە، سپێدەهیا ئەڤرۆ ٢٥٠ چەکدارێن دی یێن داعش خۆ
ڕادەستی شەڕڤان و هێزێن ئاسایشا ناڤخۆ کرینە.
ئاماژە ب وێیەکێ ژی کریە، پشتی شەش رۆژان ژ
بەردەوامیا شەڕی دناڤبەرا چەکدارێن داعش و هەسەدێ دا ل زیندانا غوێران ٨٠%ێ یا زیندانێ
کۆنترۆلکرن و چاڤەرێ ژی دهێتەکرن د دەمەکێ نێزیکدا ب تەمامی زیندانێ
کۆنترۆلبکەنەڤە.
ل گۆرەی زانیاریان، چەکدارێن داعش هەژمارەکا
زۆرا وەلاتیێن سڤیل کرینە دیل و هەڕەشەیا کوشتنێ دکەن ئەگەر زیندانێ چول نەکەن، لێ
هێزێن هەسەدێ دبێژن، "ئۆپەراسیۆنا وان بەردەوامە هەیا کو زیندانێ بتەمامی
کۆنترۆل دکەن و هەمی ڕەڤیان دەستەسەر دکەن و ئەوان وەلاتیێن سڤیل رزگار
دکەن".
ئەو ژی د دەمەکێ دایە، بۆ دەمێ پێنج رۆژانە
رووبرووبون بەردەوامە دناڤبەرا هێزێن سوریا دیموکرات و هێزێن ئاسایشا ناڤخۆیا
رۆژئاڤایێ کوردستانێ دا لهەمبەر چەکدارێن داعش بەردەوامە و هێزێن سوریا دیموکرات
بەحسا وێیەکێ کرینە هەیا نها ژمارەیا وان چەکدار و زیندانیێن داعش کو خۆ
ڕادەستکرینە گەهشتیە زێدەتری ٥٥٠ ی کەسان.
شەڤا ٢٠ی ڤێ مەهێ چەند چەکدارێن داعش
هێرشکرنە سەر گرتیگەها غوێران ل باژێرێ حەسەکێ ل رۆژئاڤایێ کوردستانێ و کوشتی و
بریندار لدیڤ خۆ ئینان، کو زیندان نێزیکی چار هزار چەکدارێن داعش تێدا دەستەسەرکری
بوون.
دەستپێکێ هێرش ب ڤی ئاوای دەستپێکر، کو
ترۆمبێلەکا سوتەمەنیێ ل نێزیک زیندانێ هاتە تەقاندن و پشترە ماترۆسیکلەک ل تەنیشت
دیوارێ گرتیگەهێ هاتە تەقاندن و ترۆمبێلەکا بۆمبەکری ل هەمان جهی هاتە تەقاندن و
شەڕی دەستپێکر.