AM:09:25:15/09/2021
1792 جار خوێندراوەتەوە
+
-
جارەکا دی دادگەهکرنا هەر ئێک ژ ماموستا
بەدەل بەرواری و ئومێد بەرۆشکی ل دادگەها کەتنا دوویا هەولێرێ بێی بڕیارا داویێ بۆ
مەها داهاتی هاتە پاشداخستن.
تێمیا پارێزەرێن دەستەسەرکریێن بەهدینان دکۆنفرانسەکێ رۆژنامەڤانیدا ڕاگەهاندن، ئەڤرۆ چارشەمبێ بۆ جارا سیێ دادگەهکرنا هەر ئێک ژ ماموستا بەدەل
بەرواری و رۆژنامەڤان ئومێد بەرۆشکی ل دادگەها کەتنا دوویا هەولێرێ بێی بڕیارا داویێ و دیارکرنا چارەنڤێسێ
وان بۆ رۆژا ١٢ی مەها ١٠ هاتە پاشداخستن.
تیما پارێزەران ئاماژە ب وێیەکێ دکەن، کو
دادوەرەکێ نوی دەست ب کاربوویە و پێداچوون د دوسەیا دەستەسەرکریان دا نەکریە ژبەر
وێیەکێ داخاز ژ سەرۆکێ دادگەهێ کریە دادگەهـ بێهێتە پاشداخستن. هەڤدەم، پارێزەرێن هەردوو دەستەسەرکریان دبێژن ژی، "دادگەهێ چ بەلگەلیێن
یاسای لبەردەست نینن بۆ تومەتبارکرنا وان".
جارا ئێکێ دادگەها کەتنا دوویا هەولێرێ رۆژا
١٧ی مەها ٨ بۆ دادگەکرنا ماموستا بەدەل بەرواری و رۆژنامەڤان ئومێد بەرۆشکی
دیارکربوو، لێ لسەر داخازا تیما پارێزەرێن دەستەسەرکریان دادگەهـ هاتە پێشخستن بۆ
٢٩ی مەها ٧ و دادگەهـ بڕێڤەچوو لێ بێی بڕیارا داویێ هاتە پاشداخستن بۆ ٣٠ی مەها
٩یا ٢٠٢١ێ. دوبارە تیما پارێزەران داخازا ئینانا پێشا دادگەهکرنێ کرن و دادگەهێ ژی
بڕیار دا ١٥ی مەها ٩ دادگەهـ بهێتەکرن کو ئەڤرۆ بوو، جارەکا دی بێی بڕیارا داویێ
دادگەهـ بۆ ١٢ی مەها ١٠ یا ئەڤ سالە هاتە پاشداخستن.
ئەڤە د دەمەکێ دایە، سالەک و مەهەک بسەر
دەستەسەرکرنا ماموستا بەدەل بەرواری و رۆژنامەڤان ئومێد بەرۆشکی دا دەربازدبن و
هێشتا دادگەها کەتنا دوویا هەولێرێ چارەنڤێسێ وان ئێک ئالی نەکریە. هەڤدەم، دوهی رێکخراوا سی پی تی یا ئەمریکی
ژ زارێ شێروان شێروانی کو بۆ دەما شەش سالێن سزادانێ د زیندانێ دایە ڕاگەهاند، "هەمی گرتیێن بەهدینان د
زیندانێ دا دەست ب گرەڤگرتنا ژ خارنێ کریە کو هەژمارا وان ٨١ کەسن و هندەک ژ وان
ئاڤێ ژی نا ڤەخۆن".
ئەڤەژی پشتی وێیەکێ دهێت،
ل ٢٢ی ٦ی ٢٠٢١ێ دادگەها تاوانێن دهۆکێ بڕیارا سالەکا زیندانکرنێ و سزایێ ٢٤٠ هزار
دیناران لسەر سێ دوسەیان بسەر ئومێد بەرۆشکی دا سەپاند، سێ تۆهمەتێن دی ژی ماینە
کو ل دادگەها دهۆکێ برێڤە بچن، ئێک دوسە ژی ل هەولێرێ لسەر هاتیەڤەکرن کو ئەڤرۆ
بوو دگەل بەدەل بەرواری.
ل مەهێن داویا سالا
دەربازبووی، هەژمارەکا چالاکڤانێن سڤیل و رۆژنامەڤان ل پارێزگەها دهۆکێ ژ ئالیێ
هێزێن ئەولەکاریا هەرێمێ ڤە هاتنە دەستەسەرکرن و بتنێ دۆسەیا شەش کەسان هاتیە ئێک
ئالی کرن و ئەوێن دی ژی هێشتا نەهاتنە دادگەهکرن و دادگەها بەشەک ژ وانا ژی بۆ مەها ١٠ یا ئەڤ سالە هاتیە
پاشداخستن.