PM:10:00:26/03/2023
1184 جار خوێندراوەتەوە
+
-
ئەندامەکێ کۆمیتەیا ناڤەندیا پارتی ڕاگەهاند، د ئەڤسالەدا هەلبژارتن دێ
هێتە ئەنجامدان، گۆت ژی، "حەفتیا داهاتی قوباد تالەبانی دێ ڤەگەڕێتە ڤە بۆ
جڤینێن حکومەتێ".
جەعفەر ئیمینکی ئەندامێ کۆمیتەیا ناڤەندیا پارتی د بەرنامەیێ تاوتوێ یێ ئێن
ئاڕ تی ڕاگەهاند، داهاتیێ هەرێمێ ب دەستێ خەلکێ هەرێمێ یە و د نها دا گەلەک
ئالنگاری هەنە و وەسا دهێتە دیتن ئەڤ بڕیارا دادگەها پاریس ژی ئالنگاریەکا دی بیت.
ئاماژە ب وێیەکێ ژی کر، بڕیارا دادگەها پاریس دەرگەهێ گوتوبێژکرنێ ب روویێ
بەغدا و هەرێمێ دێ ڤەکەت و چاڤدێریا داهاتێ پەتڕۆلا هەرێمێ د بن سەرپەرشتیا
کۆمپانیا سۆمۆ دبیت.
ئەویەک ژی بەرچاڤکر، د لهەڤهاتنا ڤێ جارێ دا ئەگەر پشکا هەرێمێ بهێتە
دیارکرن، وی دەمی هەرێمێ دگەل بەغدا ئاریشە نابیت و د دەمێ دەربازبووی دا عێراقێ
یاسایا سەرڕاستکرنا پەتڕۆل و گازێ رەتکر ژبەر وێیەکێ هەرێما کوردستانێ پەتڕۆل ب
ئاوایێ سەربەخۆ فرۆت.
گۆت ژی، "نەشێین بێژین یەکێتی و پارتی حکومرانیەکا باش یان خراپ کریە
لێ هەمی بزاڤ کرینە"
بەحسا وێیەکێ ژی کر، رەخنەیێن ئەمریکا ژی ب گەلەک وەردگرن و تەکەزیێ دکەن
کو دیموکراسی و حکومرانیا هەرێمێ ئاریشە هەیە، لێ نابیت ب حکومەتا هەرێمێ بهێتە
گۆتن کارتۆنی و دبێژیت ژی "ئەو یێ ب حکومەتا هەرێما کوردستانێ دبێژیت کارتۆنی
ئاریشەیا ئەخلاقی هەیە".
ئەویەک ژی ئەشکراکر، یەکێتی ئیرادەیا ئەرێنی بۆ ئەمجامدانا هەلبژارتنان
هەیە و زۆربەیا ئاریشەیێن د ناڤبەرا وان دا هاتینە چارەسرکرن و حەفتیا داهاتی تیما
یەکێتی دێ ڤەگەڕێت بۆ جڤینێن حکومەتێ.
زەلا ژی کر، هەمی ئالیێن سیاسیێن هەرێمێ هەڤبۆچوونن لسەر ئەنجامدانا
هەلبژارتنان د ئەڤسالە دا و ئەگەر نەهێتەکرن زەرەرەکا زۆر دێ بەر هەرێمێ کەڤیت.
ئەندامێ کۆمیتەیا ناڤەندا پارتی ئاماژە ب وێیەکێ ژی کر، ئاستێ
لهەڤتێگەهشتنا وان دگەل بەغدا و حکومەتا محەمەد شیاع سودانی باشە و ئەڤ لهەڤهاتن و
هەڤبەندیا مە دێ دگەل بەغدا بەردەوام بیت.
ئـ.عـ