شۆڕشی ئەمجارەی تۆپی پێ، بەرگری و ناوەندی بەرگری دەگرێتەوە

10/20/2016 10:31:00 AM

133 جار خوێندراوەتەوە

ساجد کەمال
+ -

ئاشنایە تۆپی پێ یەكێكە لە بەناوبانگترین یارییەكان لەسەر ئاستی جیهان، ئەمەش وای كردووە لەسەرەتای پەیدابوون و بڵاوبونەوەی بەجیهاندا هەر وڵاتێك بەفەلسەفەی خۆی هەوڵی پەرەسەندن و پێشخستنی یارییه‌که‌ی داوه‌ بەگشتی، یاخود لەلایەنی هونەری و تاكتیكیەوە.
رەنگە لەسەرەتادا پەیڕەو(ممارەسە) كردنی بەشێوەیەكی زۆر ساناو ساكار بووە دوور بووە لەگشت بەهاكانی تاکتیک و تەكنیك، دەكرێ و كراویشە لەبنەرەتەوە تا ئەم سەردەمەی ئێمەی تێدا دەژین چەندین شێواز و شۆڕش و گۆرانكاری كراوە، بەتایبەت لەئێستادا جەنگەكە بووتە جەنگی(تاکتیک). هەموو هەڵبژاردەو یانەكان رۆچوون لەقوڵایی تاکتیکدا، كەئەمەش بەنمرەی یەكەم ئەركەكەی لەئەستۆی راهێنەردایە بۆیە دەبینین لەئێستادا لەخولی پریمەرلیگ شەڕی راهێنەر و تاکتیک دەستی پێ كردووە،  بێگومان جێبەجێ كردنی تاکتیکیش لەیاریگادا پێویستی بە كۆمەڵێك یاریزان هەیە كە خاوەن تایبەتمەندی تەكنیكی به‌هێز بن.
بابێمە سەر مەبەستی نوسینی بابەتەكە(شۆرشی ئەمجارەی تۆپی پێ لەبەرگری و ناوەندی بەرگریە)، ئەگەرچی لەساڵانی پێشوودا شەری تاکتیک و پلانی راهێنەران زیاتر لەهێڵی پێشەوەو ناوەندی هێرشبەردا بووە (بەدرێژایی مێژوو ببینە ناوی پاڵەوانەكان هاوشێوەی پیلێ – مارادۆنا –مولەر –دی ستیڤانۆ -فرانک ریكارد -یۆهاین كرۆیف –بلاتەر –بیكنباوەر – بێرهۆف – رۆنالدۆ -باتیستۆتا...هتد). ئەمانە هەموو لەمێژوودا وەك پالەوانی هێڵی هێرشبەر و ناوەندی هێرشبەر ناویان ماوەتەوە، بەڵام ببینە لەدوای ساڵی(2006) كاتێك(كاناڤارۆی) ئیتالی دەچێتە سەر تەختی شانۆو ناوی وەك باشترین یاریزانی جیهان دەناسرێت و مەشخەڵی گۆرانكاری و شێوازی یاری لەتۆپی پێدا هەڵدەكات، ئیدی لەوێوە زەنگی وردو قوڵ بۆ سەرجەم راهێنەران لێدەدات و هۆشێك بەبەر شێوازی تاکتیک لەتۆپی پێ دا دێنێتەوە.
هەر لەدوای ئەو ساڵەوە ببینەو بیربكەرەوە هێدی هێدی شۆرش لەتۆپی پێدا گەڕایەوە دواوە نەك لەرووی ئاستەوە، بەڵكو راهێنەران زیاتر پلانی هونەری و تاکتیکی یانەكەیان، یاخود هەڵبژادەكەیان كاركردن بوو لەسەر بونیادنانی هێرش لەبەرگری و ناوەندی بەرگری(ارتكاز) دواتر بۆ ناوەندو ناوەندی هێرشبەر.
بۆئەوەی ئاسانتر لەبابەتەكە تێبگەین، کاناڤارۆی ئیتاڵی ده‌که‌ین به‌ نمونه‌ که‌ لەدوای بەدەستهێنانی بالۆن دۆر و لەو سەردەمدا هاوشان لەگەل چەندین ئەستێرەكانی هاوشێوەی (زێدان – كاكا – ئیتۆ – رۆنالدینهۆ – شیفچینكۆ – درۆگبا -لیۆنیل مێسی –كریستیانۆ – چاڤی –ابراهیمۆڤیچ –ئەگویرۆ -نایمار...هتد) ناوی ده‌هێنرێت، زیاتریش ناوی ئەو یاریزانانە دەمێنێتەوە كە له‌ ناوەندی بەرگری(ارتكاز) یاری دەكەن.
بۆ نمونە: ریاڵ مەدرید بەبێ كاسمیرۆ، بەرشەلۆنە بەبێ بۆسكێتس، میلانی بێ پیرلۆ، بایەر موینخ بەبی كروس، لیڤەر پوڵ بەبێ جیرارد، چێڵسی بەبێ لامبارد... ببینە گرانترین گرێبەست لەمێژووی تۆپی پێدا پۆل بۆگبای مان یووە، كڕینی تەنها یاریزانێك لە لیستەر سیتی لەلایەن چێڵسی یەوە(نگۆلۆ كانتی) که‌ لەپاڵ(ریاز مه‌حریز)ی باشترین یاریزانی پریمەرلیگ یاریی ده‌کرد.
هەموو ئەمانە و چەندانی تر ئەوەمان بۆ دەسەلمێنن كە ئیدی شۆڕشی ئەمجارەی تۆپی پێ، بەتایبەت ئەم دەساڵەی دوایی شۆڕش و گۆرانكارییەكە كە زیاتر راهێنەران و پسپۆرانی تۆپی پێ كار لەسەر یاریزانی بەرگری و بەتایبەت ناوەندی بەرگری(ارتكاز) دەكەن و وە له‌و کاره‌شیاندا سەركەوتوو بوون.