سەردێڕ:

فراکسیۆنى نەوەى نوێ: پێویستە حکومەتى عێراق سنورێک بۆ پێشێلکارییەکانى تورکیا دابنێت

هەر بێدەنگییەکی حکومەت و پەرلەمانی عێراق و هەرێمی کوردستان خیانەتکردنە
فۆتۆ: دیجیتاڵ میدیاى ئێن ئاڕ تى
2018-11-15

1770 جار خوێندراوەتەوە

فراکسیۆنى نەوەى نوێ لە پەرلەمانى عێراق ئیدانەى هێرشەکەى فڕۆکە جەنگییەکانى تورکیاى کرد بۆ سەر خاکى هەرێمى کوردستان کە شەهیدبوونى سێ هاوڵاتى لێ کەوتەوە و ڕایگەیاند، پێویستە بەغدا سنورێک بۆ ئەو پێشێلکارییانەى تورکیا دابنێت.

فراکسیۆنى نەوەى نوێ ڕایگەیاند، "ئێمە وەک فراکسیۆنی نەوەی نوێ لە پەرلەمانی عێراق بە توندی ئیدانەی بۆمبارانی ئاسمانیی ئەمڕۆی سوپای تورکیا دەکەین لە دەڤەری ئامێدی لە پارێزگای دهۆک کە بووە هۆی گیانلەدەستدانی سێ هاوڵاتی مەدەنی کە سەرقاڵی کارکردن بوون لە کێڵگەکانی خۆیان."

ئاماژەى بەوەش کرد، "لەکاتێکدا بۆمبارانی ئەمڕۆ و ئەوانەی پێشتری فڕۆکە جەنگییەکانی تورکیا پێشێلکاری تەواوی سەروەری خاکی عێراق و هەرێمی کوردستان و شکاندنی شکۆی دەوڵەتە، کەچی هیچ هەڵوێستێکی جدیمان لە حکومەتی عێراقی و هەرێم نەبینیوە بۆ سنوردانان بۆ بێڕێزیکردن بەرامبەر گیانی هاوڵاتییانی وڵاتەکەمان."

فراکسیۆنى نەوەى نوێ ئەوەشى خستوەتەڕوو، "هەر بێدەنگییەکی حکومەت و پەرلەمانی عێراق و هەرێمی کوردستان خیانەتکردنە لەو سوێندە دەستورییەی کە خواردیان لەبەردەم گەلی عێراق بۆ پاراستنی سەروەری خەڵک و خاکی عێراق."

فراکسیۆنەکە داواى هەڵوێست لە بەغدا دەکات و ڕایگەیاندووە، وەک فراکسیۆنی نەوەی نوێ لە ئەنجومەنی نوێنەرانی عێراق داوای هەنگاوی بەپەلەی سەرۆک وەزیرانی عێراق و پەرلەمان و وەزیری دەرەوە دەکەین بە ئەنجامدانی:

١- ئیدانەکردنی هێرشەکە و بەهاناوەچوونی کەسوکاری قوربانییەکان.

٢- بانگهێشتکردنی باڵیۆزی تورکیا بۆ لێپرسینەوە و گەیاندنی پەیامێکی ڕوون کە خاکی عێراق و خەڵکەکەی خاوەن سەروەرییە و بۆ هیچ دەوڵەتێک نییە دەستدرێژی بکاتە سەر.

٣- پێکهێنانی لیژنەیەکی پەرلەمانی بۆ قەرەبوکردنەوەی زیانلێکەوتووانی هێرشەکانی تورکیا و بەسەرکردنەوەی کەسوکاری قوربانییەکان.

پاشنیوەڕۆی دوێنێ چوارشەممە (١٤ی تشرینی دووەمی ٢٠١٨) فڕۆکە جەنگییەکانی تورکیا سنورەکانی ناوچەی ئامێدییان بۆردومانکردووە و بەوهۆیەشەوە سێ هاووڵاتی بە ناوەکانی ڕەمەزان محەمەد عەبدولڕەحیم و ئیسماعیل حەسەن قەبلان و دلۆڤان ساڵح حەسەن گیانیان لەدەستداوە.

ئاماژەی بەوەش کرد، ئەو سێ هاووڵاتییە خەڵکی گوندی ئەرەدنان و سەرقاڵی بەخێوکردنی مێش هەنگوین بوون.

س.س