سەردێڕ:

عادل عەبدولمەهدی: پەیوەندییەکانی بەغدا و هەرێم ئەرێنییە بۆ چارەسەرکردنی هەناردەکردنی نەوت

دۆسیەی نەوت یەکێک بووە لە ناکۆکییە سەرەکییەکان
عادل عەبدولمەهدی باس لە ناکۆکییەکانی دۆسیەی نەوت دەکات لەگەڵ هەرێم
فۆتۆ: ئەرشیڤ
2018-11-13

2385 جار خوێندراوەتەوە

عادل عەبدولمەهدی سەرۆک وەزیرانی عێراق ئەمڕۆ سێشەممە (١٣ی تشرینی دووەمی ٢٠١٨) ڕایگەیاند، پەیوەندییەکانی نێوان هەرێمی کوردستان و حکومەتی فیدراڵی ئەرێنییە بۆ چارەسەرکردنی کێشە و ناکۆکییەکانی پێشوو سەبارەت بە هەناردەکردنی نەوت.

سەرۆک وەزیرانی عێراق لە کۆنگرەی ڕۆژنامەوانی هەفتانیە خۆیدا لە بارەی پەیوەندییەکانی نێوان هەرێمی کوردستان و حکومەتی فیدراڵییەوە وتی "پەیوەندی ئەرێنی هەیە لە نێوان حکومەتی فیدراڵی و هەرێمی کوردستاندا، بۆ چارەسەرکردنی کێشە و ناکۆکییەکانی هەڵپەسێردراوەکانی پێشوو سەبارەت بە هەناردەکردنی نەوت".

عەبدولمەهدی ڕاشیگەیاند "لە داهاتوویەکی نزیکدا کارەکانی تەواوکردنی کابینەی حکومەت تەواو دەبن".

ئەوە لە کاتێکدایە لە ماوەی چەند ڕۆژی ڕابردوودا وەک پابەند بوون بە سزا سەپێنراوەکانی ئەمریکا بەسەر ئێراندا لە بواری نەوتدا، حکومەتی عێراق بڕیاریدا چیتر نەوتی خاوی خۆ لەڕێگەی تانکەرەوە رەوانەی ئێران دەکات.

لە ئێستاشدا بەهۆی لێتێگەیشتنەکانی نێوان حکومەتی هەرێمی کوردستان و حکومەتی فیدراڵییەوە، بڕیارە بەغدا و هەرێم ڕێککەوتن بکەن کە نەوتی کەرکوک لە ڕێگەی بۆری نەوتی هەرێمی کوردستانەوە هەناردەی دەرەوە بکرێت و بۆ سەر بەندەری جەیهانی تورکیا.

لە ماوەی چەند ساڵی ڕابروودا یەکێک لە دۆسیە ئاڵۆزەکانی نێوان حکومەتی هەرێمی کوردستان و بەغدا، بابەتی هەناردەکردنی نەوت بووە، بەشێوەیەک بەغدا هەرێمی تۆمەتبار کردووە بە بێ رەچاوکردنی دەستور هەرێمی کوردستان نەوت هەناردەی دەرەوە دەکات، لە بەرامبەریشدا حکومەتی هەرێمی کوردستان جەختدەکاتەوە مافی خۆیەتی نەوتی هەرێم هەناردەی دەرەوەی بکات.

ع.م