سەردێڕ:

خشتەى دابەشکردنى موچەى سەرجەم وەزارەتەکان ڕاگەیەنرا

موچەى مانگى ١٢ى ساڵى ڕابردوو
فۆتۆ: 
2020-03-26

126714 جار خوێندراوەتەوە

دیجیتاڵ میدیاى ئێن ئاڕ تى، هەولێر، ئەحمەد مستەفا

وەزارەتی دارایی هەرێم لیستی موچەی راگەیاند و بەپێی ئەو خشتەیە تاوەکو رۆژی نۆی نیسان، موچەی مانگی ١٢ی ساڵی رابردووی سەرجەم وەزارەتەکان دابەشدەکرێت.

ئەمڕۆ پێنجشەممە، ٢٦ی ئازاری ٢٠٢٠، وەزارەتی دارایی لیستی موچەی سەرجەم وەزارەتەکانی بڵاوکردەوە و بەپێى خشتەکە، ڕۆژى یەکشەممە، ٢٩ى ئازار، موچەى ئەنجومەنى ئاسایش و دەزگاى گشتى ئاسایش دابەشدەکرێت.

هەر بەپێی خشتەی وەزارەت، ڕۆژى یەکشەممە و دووشەممە، ٢٩ و ٣٠ى ئازار، موچەى وەزارەتى پەروەردە، سێشەممە ٣١ى ئازار، موچەى ئەنجەمەنى دادوەرى و وەزارەتى داد و وەزارەتى سامانە سروشتییەکان دابەشدەکرێت.

هاوکات، رۆژى چوارشەممە یەکى نیسانی ٢٠٢٠، موچەى وەزارەتەکانى ئەوقاف و پلاندانان، دابەشدەکرێت، رۆژی پینجشەممە دووى نیسانی ٢٠٢٠، موچەى وەزارەتەکانى، گواستنەوە و گەیاندن، پیشەسازى و بازرگانى، دیوانى چاودێرى دارایى، مافى مرۆڤ، ناوچەکانى دەرەوەى هەرێم، دەستەى ژینگە، دەستەى وەبەرهینان، دەستەى دەسپاکى، کۆمسیۆنى هەڵبژارن و دەزگاى مین دابەشدەکرێت.

لە خشتەکەدا هاتووە، شەممە و یەکشەممە چوار و پێنجی نیسانی ٢٠٢٠، موچەى وەزارەتى کار و کاروبارى کۆمەڵایەتى و خاوەنپیداویستی تایبەت، یەکشەممە پێنجى نیسان، موچەى وەزارەتى خویندنى باڵاو توێژینەوەى زانستى، دووشەممە و سێشەممە، شەش و حەوتی نیسان، موچەى خانەنشینى پێشمەرگە، دابەشدەکرێت.

دووشەممە، شەشى نیسان، وەزارەتى شارەوانى و گەشتوگوزار، سێشەممە، حەوتى نیسان، وەزارەتى کارەبا، چوارشەممە، هەشتى نیسان، وەزارەتى کشتوکاڵ و وەزارەتى ڕۆشنبیرى، پێنجشەممە نۆی نیسان، وەزارەتى ئاوەدانکردنەوە و سەرۆکایەتى هەرێم و پەرلەمان و ئەنجومەنى وەزیران، هەروەها هەشت و نۆى نیسان، خانەنشینى شارستانى دابەشدەکرێت.

ئەو موچەیەى دابەشدەکرێت موچەى مانگى ١٢ى ساڵى رابردووە و ١٣یەمین موچەیە بەبێ پاشەکەوت دابەشبکرێت.

لە رۆژی ٨ی ئازاری ساڵی رابردوودا پاشەکەوتی موچە هەڵگیرا و لەو کاتەوە تاوەکو ئێستا ١٢ موچەی بێ پاشەکەوتی سەرجەم وەزارەتەکان دابەشکراوە.



‌بەپەلە