سەردێڕ:

عێراق.. ٢٢ توشبووی نوێی کۆرۆنا تۆمارکران

فۆتۆ: 
2020-03-25

8003 جار خوێندراوەتەوە

وەزارەتى تەندروستیی عێراق رایگەیاند، لە ٢٤ کاتژمێری رابردوودا یەک حاڵەتی گیان لەدەستدان و ٢٢ حاڵەتى نوێى توشبوون بە ڤایرۆسى کۆرۆنا تۆمارکراون، نۆ کەسی دیکەش چاکبوونەتەوە.

ئەمڕۆ چوارشەممە، وەزارەتی تەندروستیی عێراق لە راگەیاندراوێکدا بڵاویکردەوە، "یەک حاڵەتی نوێی گیانلەدەستدان بە کۆرۆنا لە عێراق تۆمارکرا، کە لە شاری بابلە".

لە نووسراوەکەدا ئەوەش هاتووە، "٢٢ حاڵەتی نوێی توشبوون بە ڤایرۆسەکە تۆمارکراوە، کە لەو ژمارەیەش شەش حاڵەت لە بەشی رەسافەی بەغدا، چوار لە کەربەلا، چوار لە نەجەف، سێ لە شاری پزیشکی بەغدا، دوو لە موسەنا، یەک لە بەسڕە، یەک لە دیوانیە و یەکێکیش لە کەرکوک".

ئاماژە بەوەشكراوە، "نۆ کەسی دیکەش بەتەواوی چاکبوونەتەوە و نەخۆشخانەیان بەجێهێشتووە، کە سیانیان لە بەسڕە، دووانیان لە رەسافە، دووان لە نەجەف، یەکێک لە کەربەلا و یەکێکی دیکەش لە دیالە".

بەپێی ئامارەکانی وەزارەتی تەندروستیی، تاوەکو ئێستا ٣٤٦ توشبووی کۆرۆنا لە عێراقدا تۆمارکراوە و لەو ژمارەیەش ٢٩ کەس گیانیان لەدەستداوە و ٨٩ حاڵەتی چاکبوونەوە هەیە.

هـ.ئـ