سەردێڕ:

عێراق .. قەدەغەی هاتوچۆ بۆ ماوەی پێنج ڕۆژى دیکە درێژکرایەوە

فۆتۆ: 
2020-03-22

5603 جار خوێندراوەتەوە

لیژنەى ڕوبەروبوونەوەی کۆرۆنای حکومەتى عێراق ڕایگەیاند، قەدەغەی هاتوچۆ بۆ ماوەی پێنج ڕۆژى دیکە لەسەرجەم پارێزگانی عێراق درێژکراوەتەوە  کە دەکاتە ڕۆژى شەممەی داهاتوو.

لیژنەى روبەڕووبونەوەى ڤایرۆسى کۆرۆنا بەسەرۆکایەتى وەزیرى تەندروستى و ژینگەى عێراق کۆبوونەوە و دواتر بڕیارى درێژکردنەوەى قەدەغەى هاتوچۆیان دەرکرد، لە نوسراوێکى فەرمیدا وەزارەتى تەندروستى عێراق رایگەیاندووە، لەپێناو سەلامى گیانى هاوڵاتیان و بۆ کۆنتڕۆڵکردنى ڤایرۆسى کۆرۆنا، لیژنەکە بڕیاریداوە تا کاتژمێر١١ى شەوى ٢٨ى ئەم مانگە لەسەرتاسەرى کۆمارى عێراقدا قەدەغەى هاتوچۆ درێژبکرێتەوە و گەشتە ئاسمانییەکانیش هەتا ئەو ڕێکەوتە رادەگیرێت.

لە بڕیارەکەى لیژنەى روبەڕووبونەوەى کۆرۆنادا هاتووە، کارمەندى ئەم دەزگا و شوێنانەى لاى خوارەوە بڕیارى قەدەغەى هاتوچۆ نایانگرێتەوە، فەرمانگە تەندروستى و ئەمنى و خزمەتگوزارییەکان، دیپلۆماتکار و میدیاکار و کارمەندانى دەزگاکانى راگەیاندن کە دەبێت پێناسى دەزگاکەیان پێبێت، کارمەندانى دەرمانخانە و کۆگاکانى دەرمان و خۆراک و نانەوا و سەمونخانەکان، کارمەندانى بەنزینخانە و شوێنەکانى فرۆشتنى سوتەمەنى، کارمەندانى ئەو نەخۆشخانانەى سەر بە وەزارەتى کشتوکاڵن.

لیژنەکە داواشى لە وەزارەتى دارایى کردووە بڕی ٥٠ ملیۆن دۆلار بۆ کڕینى پێداویستییە پزیشکیەکان تەرخانبکات، هاوکات داواشى لە حکومەت کردووە، لێسەندنەوەى ئەو قەرزانەى لە فەرمانبەران و هاوڵاتیان وەردەگیرێت هەتا دواى قەیرانە رابگیرێت.

ئەوەش لەکاتێکدایە، بەهۆى مەترسییەکانى بڵاوبوونەوەى ڤایرۆسى کۆرۆنا ماوەى زیاتر لە هەفتەیەکە لە پارێزگاکانى عێراق و هەرێم بەمەبەستى نەهێشتنى قەرەباڵغى و بەریەککەوتن قەدەغەى هاتوچۆ راگەیەندراوە.

 




‌بەپەلە