سەردێڕ:

ئەمریکا لە سێ بنکەی سەربازیی لە عێراق دەکشێتەوە

فۆتۆ: 
2020-03-17

7919 جار خوێندراوەتەوە

ماڵپەڕی بی بی سی بڵاویکردەوە، ئەمریکا بڕیاریداوە لە سێ بنکەی گەورە و سەرەکی سەربازیی لە عێراقدا بکشێتەوە و ئەوەش بەمانای کەمکردنەوەی کاریگەری و ئامادەبوونی ئەو وڵاتە دێت لە عێراقدا.

ماڵپەڕی بی بی سی بەریتانی لە راپۆرتێکدا ئاماژەی بەوەداوە، ئەمریکا لە عێراقدا هەشت بنکەی سەربازیی هەیە و لە ئێستادا بڕیاریداوە لە سێ بنکەیاندا بکشێتەوە کە یەکەمیان بریتییە لە بنکەی سەربازیی قائیم.

باس لەوەشکراوە، وابڕیارە لەم هەفتەیەدا ئاهەنگی ماڵئاوایی لە بنکەی قائیم سازبدرێت و تێیدا، ئەمریکا هەموو کەرەستە سەربازییەکانی بۆ هێزە عێراقییەکان جێبهێڵێت تا دڵنیاببێتەوە لەوەی هێزە ناوخۆییەکان دەتوانن ئاسایشی ناوچەکە بپارێزن.

هاوکات، ئەمریکا بڕیاریداوە لە بنکەی قەیارە، ناسراو بە کی وێست بکشێتەوە کە پێشتر و لە سەردەمی داعشدا بۆ ئۆپەراسیۆنەکانی کۆنتڕۆڵکردنەوەی موسڵ بەکاردەهات.

لەلایەکی دیکەوە، ئەمریکا بڕیاریشیداوە لە بنکەی سەربازیی کەرکوک، ناسراو بە کەی وەن بکشێتەوە کە لە چەند مانگی رابردوودا موشەکی ئاڕاستەکرا و تێیدا بەڵێندەرێکی ئەمریکی کوژرا و وڵاتەکەشی لە تۆڵەیدا، بارەگاکانی حزبوڵای عێراقی بۆردومانکرد و ئەو زنجیرە رووداوانەش، کوژرانی قاسم سولەیمانی، فەرماندەی فەیلەقی قودسی سوپای پاسدارانی ئێرانی لێکەوتەوە.

ئەمەش لەکاتێکدایە، ئەگەرچی هەندێکجار بەرپرسانی ئەمریکا باسیان لە کشانەوەیان کردووە، بەڵام پێدەچێت ئاراستەکردنی نزیکەی ١٦٠ موشەک لە چەند مانگی رابردوودا بۆ سەر بنکە سەربازییەکانی ئەو وڵاتە لە عێراقدا، هۆکاری سەرەکی کشانەوەیان بێت لەو سێ بنکەیەدا.

هـ.ب