سەردێڕ:

عێراق.. لەبۆردومانەكەی شەوی ڕابردوودا شەش كەس كوژراون

فۆتۆ: 
2020-03-13

16015 جار خوێندراوەتەوە

سوپای عێراق ڕایگەیاند، لە هێرشەكەی شەوی رابردودا بۆ سەر بارەگاكانی حزبوڵا و فڕۆكەخانەكەی كەربەلا شەش كەس كوژراون و ١٢ى دیکەش برینداربوون.

لەراگەیەندراوێکدا سەرکردایەتى ژورى ئۆپراسیۆنە هاوبەشەکانى سەر بە سوپاى عێراق رایگەیاند، لەبەرەبەیانی ئەمڕۆ هەینیدا، فڕۆكە جەنگییەكانی ئەمریكا چەند بنكەیەكی سەربازی لە فیرقەی ١٩ى مغاویری سەر بە سوپای عێراق و فەوجی سێی پۆلیسی بابل و بنكەی سەربازی ٤٦ى حەشدیان كردووەتە ئامانج، بەو هۆیەشەوە سێ سەربازی سوپای عێراق و دوو كارمەندی پۆلیسی بابل و كەسێكی مەدەنی كوژراون و نزیكەی ١٢ كەسیی دیكەش بریندار بوون.

لە ڕاگەیەندراوەكەدا ئاماژە بەوەشكراوە، هەر بەهۆی هێرشەكانی ئەمریكاوە لە ناوچەكانی بابل و كەربەلا، تائیستا تەرمی ژمارەیەك لە كوژراوەكان لە ژێر داروپەردوی فرۆكەخانەكەی كەربەلادان و ڕەنگە ژمارەی كوژراوەكانیش لەداهاتوودا زیاد بكات.

لەبارەی بریندارەكانیشەوە ئەوە خراوەتەڕوو، پێنج لە بریندارەكان سەر بە هێزەكانی حەشدی شەعبین و یەكێكیشیان كرێكارێكی فڕۆكەخانەكەی كەربەلایە، ئەوانی دیكەش لە ڕیزەكانی سوپای عێراقن.

وتيشى، "ئەم هێرشانە لەدەرەوەى ئیرادە و دەسەڵاتى عێراق کراون و دەستدرێژییە بۆسەر سەروەرى خاکى عێراق و دوپاتیدەکەینەوە کە هیچ کەسێک و لایەنێک مافى ئەوەى نییە بەناوى عێراقەوە قسە بکات و لێدوان بدات و دەرئەنجام و مەترسى خراپى دەبێت".

لەبارەی زەرەر و زیانە مادییەكانیشەوە راگەیەندراوەكەی سوپای عێراق ئاماژەی بەوەكردووە، جگە لەزیانێكی ماددی زۆر كە بەر فڕۆكەخانە نوییەکەى كەربەلا گەیشتووە، سەرجەم كۆگاو شوێنی چەك و تەقەمەنییەكانی سوپای عێراقیش لەو بنكانەی بۆردومان كراون تێكشكێنراوە و لەكاركەوتوون.

ئەوەش لەکاتێکدایە، شەوى رابردوو، وەزارەتی بەرگریی ئەمریکا رایگەیاند، بە فڕۆکەی جەنگی پێگەکانی حزبوڵای عێراقیان بۆردومانکردووە و لە هێرشەکانیشدا فڕۆکەی بێ فڕۆکەوان بەکارنەهاتووە.

Image may contain: one or more people and outdoor

Image may contain: 1 person, outdoor