سەردێڕ:

رۆیتەرز: ئەمریکا بۆردومانی بنکەکانی حزبوڵا دەکات لە بابل

فۆتۆ: 
2020-03-13

18970 جار خوێندراوەتەوە

ئاژانسی هەواڵی رۆیتەرز لە زاری بەرپرسانی ئەمریکاوە بڵاویکردووەتەوە، لە تۆڵەی هێرشی شەوى رابردووى سەر سەربازگەی تاجی بەغدا، بنکەکانی حزبوڵای عێراق لە شاری بابل بۆردومانکران.

ئاژانسی هەواڵی رۆیتەرز بڵاویکردووەتەوە، هێزەکانی هاوپەیمانان بە سەرکردایەتی ئەمریکا، پپێنج بنکە و بارەگاى حزبوڵای عێراقیان لە شاری بابل بۆردومانکرد.

هاوکات، بەرپرسێکی وەزارەتی بەرگریی ئەمریکا رایگەیاند، بۆردومانەکان بە فڕۆکەى جەنگى کراون و فڕۆکەى بێ فڕۆکەوان بەکارنەهێنراوە، ئەو پێنج بنکەیەش کە بۆردومانکران، شوێنی عەمبارکردنی چەکی حزبوڵا بووە.

بەپێی میدیا عەرەبییەکان، بەهۆی بۆردومانەکانەوە زیانێکی زۆر بەر بارەگاکانی حزبوڵای عێراق لە شاری بابل کەوتووە و ژمارەیەکی زۆر لە ئۆتۆمبێلی فریاکەوتن رەوانەی شوێنی بۆردومانەکان کراون. 

ئەو هێرشە دواى ئەوە هات، شەوی رابردوو، لە هێرشێکی موشەكیدا بۆ سەر بنكەی سەربازی تاجی لەبەغدا، سێ سەرباز كوژراون كە دووانیان ئەمریكین و ئەوەی دیکەیان بەریتانیە، هەروەها ژمارەیەک سەریازى دیکەش برینداربوون.

 

‌بەپەلە