سەردێڕ:

بەغدا.. ١٠ موشەکى کاتیۆشا لە بنکەى سەربازى تاجى ئەمریكییەكان کەوتەوە

فۆتۆ: 
2020-03-11

3283 جار خوێندراوەتەوە

شانەی ئەمنی عێراقی ڕایگەیاند، ١٠موشەکى جۆرى کاتیۆشا لە بنکەى سەربازى تاجى كەوتەوە کە هێزەکانى ئەمریکاى تێدایە.

لە ڕاگەیەندراوێکدا شانەى ئەمنى عێراقی بڵاویکردەوە، ئەمشەو ١٠ موشەکى جۆرى کاتیۆشا لە بنکەى سەربازى تاجى لە باکورى بەغداى پایەتەخت کەوتەوە و هیچ زیانێکى گیانى بەدواوە نەبووە.

بنکەى سەربازى تاجی جگە لە هێزە ئەمنییەکانى عێراق، ژمارەیەک هێزى ئەمریکا و هاوپەیمانانیشى تێدایە.

ڕاگەیەندراوەکە ئاماژەى بەوەشکردووە، دوای ڕووداوەكە هێزە ئەمنییەكانی عێراق لە نزیك ناوچەی ڕاشیدییە ی بەغدا دەستیان بەسەر ئۆتۆمبێلێكی جۆری كیا گرتووە، كە سێ موشەكی كاتیۆشا و بنكەیەكی تەقاندنی موشەكی هەڵگرتووە.

ئەوەش لەكاتێكدایە، لە ماوەی ڕابردوودا چەندجارێك بنكە سەربازییەكانی ئەمریكا و هێزەكانی عێراق ڕووبەڕووی هێرشی موشەكی بوونەتەوە، لای خۆشیانەوە بەرپرسانی ئەمریكا بەردەوام گروپە چەكدارەكانی نزیك لە ئێران بەو هێرشانە تۆمەتبار دەكەن.

إ.م

إ.م