سەردێڕ:

سەرۆکایەتى تورکیا: وەڵامى هێرشەکانى سوریا دەدەینەوە

دۆخى ئیدلیب
فۆتۆ: 
2020-02-18

4948 جار خوێندراوەتەوە

وتەبێژى سەرۆکایەتى کۆمارى تورکیا رایگەیاند، وڵاتەکەى بەردەوامدەبێت لە ناردنى هێزى سەربازى بۆ ئیدلیب و وەڵامى هێرشەکانى حکومەتى سوریاش دەداتەوە.

ئیبراهیم کاڵن، وتەبێژى سەرۆکایەتى کۆمارى تورکیا ئەمڕۆ سێشەممە رایگەیاند، "ناردنى هێزى سەربازى بۆ ئیدلیب لە پێناو پاراستنى هاوڵاتییانى مەدەنى ناوچەکەیە و بەردەوامدەبێت".

سەبارەت بە گۆڕانکارى لە خاڵەکانى چاودێرى تورکیا لە سنورەکانى ئیدلیب لە سوریا، وتەبێژى سەرۆکایەتى کۆمارى تورکیا ئاماژەى بەوەکرد، "هیچ شتێک لەو بارەیەوە نییە. "

وتیشى، "هەڵوێستى وڵاتەکەى لە گفتوگۆکانى مۆسکۆدا گەڕانەوەیە بۆ ئەو سنورانەى لە رێکەوتنى سوچیدا ئاماژەى پێکراوە و گفتوگۆکانیش لەگەڵ روسیا لەو بارەیەوە بەردەوام دەبێت."

وتەبێژى سەرۆكايەتى كۆمارى توركيا، باسى لەوەشکرد، "تائێستا هیچ ئەنجامێک دەرنەچووە لە گفتوگۆكانمان لەگەڵ لایەنى روسی كە دڵنەواييمان بداتێ و ئێمەش قبووڵى ئەو نەخشە و پەڕاوەمان نەكرد كە پێشكەشكرا".

هاوکات، نەتەوە یەکگرتووەکان داواى ئاگربەستى لە باکورى رۆژئاواى سوریا کرد و دۆخى ئیدلیبیشی بە گەورەترین کارەساتى مرۆیی لە سەدەى ٢١دا ناوبرد.

ئەوەش لەکاتێکدایە، دۆخى ئیدلیب لە سوریا بەهۆى بۆردومانەکانى سوپاى روسیا و سوریاوە رۆژ بەرۆژ ئاڵۆزتر دەبێت، سەربارى ئەوەش گرژییەکانى نێوان سوریا و تورکیا لەو سنورە زیاتر بووە و ناوبەناو هێرش دەکەنە سەر یەکتر.

ب.ب